ԱԺ հանձնաժողովների համատեղ նիստում 2019-ի պետբյուջեի նախագծի քննարկման ժամանակ պատգամավորները հետաքրքրվել էին, թե հեղափոխությունից հետո ստվերը որքանո՞վ է կրճատվել, ի՞նչ են արել այդ առումով: ՊԵԿ նախագահ Դավիթ Անանյանը պատասխանեց, որ բավականին խորքային աշխատանք են կատարել. «Այն հաշվարկելի չէ, որովհետեւ մենք ստվերի դեմ պայքար իրականացնում ենք միկրո մակարդակում: Մենք մեր վերլուծական աշխատանքներն անում ենք կոնկրետ հարկ վճարողի վարքագծին գնահատականներ տալով: Դա լա՞վ է՝ ոչ, որովհետեւ չունենք այն համակարգը, որն ուզում ենք այսօր մեր մոտ կայացնենք»:
Նա ասաց, որ նոր համակարգով ստվերի գնահատականը տալու են՝ ըստ գործունեության ոլորտների ու այդ գնահատականը տալուց հետո այն ոլորտը, որը հարկունակ է, պետք է միջին վիճակագրական հարկ վճարողի պրոֆիլ ձեւավորեն. «Ունենալու ենք ինտերակտիվ ավտոմատ մի համակարգ, ելակետային տվյալները անընդհատ փոփոխվելու են: Ստվերի գնահատականը միջազգային չափանիշներին համահունչ պետք է լինի»: Նա ասաց, որ այդ համակարգի ստեղծման արդյունքում ամեն օր միջին ստվերի գնահատականը կունենան՝ կոնկրետ ոլորտում. «Այդ գնահատականից հետո կիջնենք այդ ոլորտները, կտեսնենք այդ ոլորտում ովքեր են հիմնական խաղացողները»:
Հռիփսիմե ՋԵԲԵՋՅԱՆ
