Դեկտեմբերի 9-ին կայանալիք ՀՀ ԱԺ արտահերթ ընտրությունների քարոզարշավը կտեւի 12 օր: Նման որոշում է կայացրել այսօր ՀՀ կենտրոնական ընտրական հանձնաժողովը: Ըստ որոշման՝ այն սկսվելու է նոյեմբերի 26-ին եւ ավարտվելու դեկտեմբերի 7-ին: Ինչպես հայտարարեց ՀՀ կենտրոնական ընտրական հանձնաժողովի նախագահ Տիգրան Մուկուչյանը, կուսակցությունների տարածքային ցուցակների առավելագույն թիվը պետք է սահմանվի ընտրությունների նշանակման օրվանից տասը օրվա ընթացքում, իսկ կուսակցությունների գրանցման փաստաթղթերը պետք է ԿԸՀ ներկայացնել քվեարկության օրվանից ոչ ուշ, քան 25 օր առաջ, ասել է թե՝ մինչեւ նոյեմբերի 14-ը՝ ժամը 18:00-ն:
Տիգրան Մուկուչյանը տեղեկացրեց, որ կուսակցությունների կամ կուսակցությունների դաշինքների ընտրական ցուցակների գրանցումը կիրականացվի նոյեմբերի 14-19-ը. «Ըստ օրենքի՝ յուրաքանչյուր 15.000 քաղաքացու հաշվարկով կարող է առաջադրվել մեկ տարածքային թեկնածու: Օրինակ՝ Ավան եւ Նոր-Նորք, Քանաքեռ-Զեյթուն վարչական շրջաններն ընդգրկող թիվ 1 ընտրատարածքում հաշվառված է մոտ 200.000 ընտրող, եւ այդ ընտրատարածքում կարող է առաջադրվել առավելագույնը 13 թեկնածու»:
Տիգրան Մուկուչյանը նկատեց՝ ընտրությունների համար նախապատրաստական աշխատանքների ժամանակը շատ չէ, բայց դրանք իրականացվելու են ոչ ծավալով:
Լուիզա ՍՈՒՔԻԱՍՅԱՆ
