«Առավոտի» զրուցակիցն է «Քաղաքացիական պայմանագիր»
կուսակցության վարչության անդամ Ալեն Սիմոնյանը
– Իրավական հնարավորություն կա՞ր նոր Ընտրական օրենսգիրքը երրորդ անգամ ներկայացնելու խորհրդարանի քննարկմանը: Ինչո՞ւ իշխանությունը չօգտագործեց այդ տարբերակը:
– Ժամկետի առումով՝ չկար: Եթե մենք ենթադրում ենք, որ դեկտեմբերին պետք է արտահերթ ընտրություն անեինք, այդ հնարավորությունն արդեն չէր մնում:
– Այս օրերին շատ հնչեց հարցը՝ ո՞ւմ էր ձեռնտու հին ԸՕ-ով ընտրությունների գնալ: Ո՞ւմ էր ձեռնտու:
– Ընդհանրապես, այդ օրենսգիրքը գրվել է իշխանության համար. այն իշխանության, որը եղել է: Ես ենթադրում եմ, որ իրենք իներցիայով փորձեցին պահել: Անկեղծ ասած, չգիտեմ՝ ինչո՞ւ փորձեցին պահել: Իրենց հաշվարկով, ենթադրում եմ, իրենք ենթադրում են, որ ավելի շատ ձայն կհավաքեն, ինչի հետ ես համաձայն չեմ: Ժամանակը ցույց կտա: Բայց, ընդհանրապես, այդ օրենսգիրքը գրվել է իշխանության համար, եւ ակնհայտ է, որ մեր կողմից մենք ամեն ինչ արեցինք, որ այդ օրենսգիրքը պատմության գիրկն ուղարկենք: Եվ ես ձեզ վստահեցնում եմ՝ նոր ԱԺ-ն կրկին անդրադառնալու է Ընտրական օրենսգրքին, եւ մենք բերելու ենք այն սկզբունքները, որոնք դրված են եղել նախագծի մեջ:
– Բայց նոր իշխանություններն այդքան չջանացին կարծես նոր ԸՕ-ն ընդունելու հարցում. այլ դեպքերում մարդկանց էիք հրավիրում, ԱԺ դարպասներն էին բացվում, ճնշում էր գործադրվում: Ընդամենը մեկ ձայն պակասեց, ինչո՞ւ այդ մեկ ձայնը չկարողացաք ապահովել:
– Գիտեք ի՞նչ, սա այդ դեպքը չէր, որպեսզի մենք դիմեինք մարդկանց օգնությանը:
– Ինչո՞ւ այդ դեպքը չէր: Ինչո՞վ էր տարբերվում նախորդներից:
– Գիտեք ինչ, այնուամենայնիվ, դա պատգամավորների իրավունքն է, չէ՞…
– Հոկտեմբերի 2- ին ԱԺ կանոնակարգ-օրենքի փոփոխության քվեարկությունն էլ էր պատգամավորների իրավունքը:
– Դա՝ ձեր նշած դեպքը, քաղաքական իրավիճակի փոփոխմանը միտված քայլ էր:
– Սա էլ:
– Համաձայն չեմ: Սա ընտրության մասնակցության կանոնների փոփոխություն էր:
– Երկու դեպքերն էլ քաղաքական իրավիճակ են ձեւավորում:
– Դա ձեր գնահատականն է: Ընտրությունը քաղաքական իրավիճակ համարել հետհեղափոխության մասով, հակահեղափոխության մասով՝ սխալ է: Այսինքն՝ դուք ուզում եք ասել, որ մենք չենք կարող, հա՞, այս ԸՕ-ով գնալ ընտրությունների եւ հետո փոխել:
– Ես ձեր կարծիքն եմ ուզում իմանալ:
– Մի բան է, երբ դու հնարավորությունից զրկում ես մարդկանց ԱԺ-ում իրենց կարծիքը ցուցադրելու՝ այն պարագայում, երբ որ նախկին իշխանությունը տապալվել է, եւ նոր իրավիճակ է, հեղափոխություն է տեղի ունեցել: Այլ բան է, երբ ԱԺ-ում ներկայացված անձինք չեն համաձայնում ԸՕ-ի փոփոխությունների հետ: Ես չեմ ուզում մեկը մյուսի հետ համեմատել: Մենք մեր կողմից ամեն ինչ արեցինք եւ քաղաքական կոնսուլտացիաների, քննարկումների շնորհիվ եկանք-հասանք մի իրավիճակի, երբ որ պատգամավորները, թվում էր, պետք է քվեարկեն: Բայց դա տեղի չունեցավ:
– Քաղաքական կոնսուլտացիաների մասին խոսեցիք, բայց ՀՀԿ-ից հնչեցին պատգամավորների վրա ճնշումների մասին ահազանգեր, մամուլում հրապարակումներ եղան, փոխվարչապետ Արարատ Միրզոյանն էլ չհերքեց, ասաց՝ զանգահարել, իր գործընկերների ողջությունն է հարցրել:
– Եկեք հասկանանք՝ ի՞նչ ճնշում կարող է լինել:
– Ասենք՝ նախկին գործած «մեղքերի» հիշեցում:
– Եթե նախկինում կան գործած «մեղքեր», եւ դրանք օրենքի խախտում են, անկախ նրանից՝ կգային իրենք ԸՕ-ին կքվեարկեին, թե ոչ, օրենքի շրջանակում իրենք իրենց պատիժը կստանան: Բոլորը խոսում են՝ ճնշում, ճնշում, բայց ոչ մեկը չի ասում, թե ի՞նչ ճնշման մասին է խոսքը: Եթե մարդը որեւիցե բան չի արել օրենքի առջեւ, ինքը որեւէ անհանգստանալու բան չունի: Իսկ եթե ինքն ինչ-որ հարցում մեղավոր է օրենքի առջեւ, անկախ նրանից՝ ինքը մեզ ամեն օր վարդեր կուղարկի, թե ոչ, իր պատիժը ստանալու է՝ օրենքով սահմանված ձեւով:
Բա եթե մենք ճնշումներ էինք գործադրում, ԸՕ-ն ինչո՞ւ չանցավ: Սա եւս մեկ ապացույց է առ այն, որ իրականում շատ ավելի շատ բան է մեզ վերագրվում՝ բացասական առումով, քան իրականության մեջ գոյություն ունի:
– Երբ ԸՕ-ի տապալման համար մեղադրանք է ուղղվում ՀՀԿ-ի կողմը, ասվում է, որ ռեյտինգային համակարգով փորձելու են ձայներ կորզել հաջորդ խորհրդարանում հայտնվելու համար: Ինչպե՞ս են դա անելու, եթե այն մարդիկ, ովքեր ռեյտինգային ընտրակարգով ՀՀԿ-ի համար ձայներ էին բերում, այսօր Նիկոլ Փաշինյանի իշխանության կողքին են:
– Ո՞վ, օրինակ:
– ՀՀԿ-ի գործարար թեւի պատգամավորները, ովքեր նաեւ ստորագրեցին ընտրությունները դեկտեմբերին անցկացնելու հայտարարության տակ:
– Ո՞վ, ո՞վ…
– Սամվել Ալեքսանյան, Արայիկ Գրիգորյան եւ մյուս գործարարները:
– Ըստ ձեզ՝ պարոն Ալեքսանյանը մեզ համար ձա՞յն է բերելու կամ մեր ցուցակո՞ւմ է լինելու:
– Համենայնդեպս, ՀՀԿ-ի համար էլ չեն կարողանալու ձայն բերել:
– Դե չի լինի… թող իրենք մտածեին՝ քվեարկեին: Ես, ընդհանրապես, մտածում եմ՝ իրենց շանսը չորրորդ ուժի ներս մտնելու հնարավորությունն էր: ՀՀԿ-ի համար միակ հնարավորությունը օրենքով ամրագրված այն չորրորդ ուժն էր: Եթե նման հնարավորություն էր լինում, ՀՀԿ-ն կարող էր այդ պարագայում իներցիայով, հաշվի առնելով, որ նախորդ իշխանությունը դեռ ամբողջությամբ չէ, որ դուրս է եկել պետական համակարգից, հնարավորություն կար, որ ՀՀԿ-ն կհայտնվեր խորհրդարանում: Դրա համար էինք մենք զարմանում… ինչպես պարոն վարչապետն ասաց, հիմա իրենք զրո ձայն են հավաքելու:
– Մինչդեռ ՀՀԿ-ից հայտարարություններ են արդեն հնչում, որ հավակնելու են երկրորդ ուժը լինելուն:
– Թող առաջինի համար հավակնեն, ի՞նչ տարբերություն, մեկ է՝ ոչ այն է լինելու, ոչ էլ այն: Գիտեք, յուրաքանչյուր ընտրություն ունենում է իր իր ենթատեքստը: Այ, ինչի՞ մասին է այս ընտրությունը: Գալիք ընտրությունը լինելու է ՀՀԿ-ի գործելաոճը եւ ՀՀԿ-ն մերժելու մասին: Սա լինելու է ՀՀԿ-ն մերժելու ընտրություն, եւ այդ ընտրություններում ՀՀԿ-ն ջախջախիչ պարտություն է կրելու, որից հետո իրենք, ենթադրում եմ, առնվազն մեկ տասնամյակ խելքի չեն գալու:
– Դուք կանխորոշում եք ընտրությունների ե՞լքը:
– Ես քաղաքական գնահատական եմ տալիս: Ես հայտարարում եմ, որ ՀՀԿ-ն ջախջախիչ պարտություն է կրելու, եւ ես ամեն ինչ անելու եմ դրա համար. եթե նույնիսկ դեռ կան ինչ-որ մարդիկ, ովքեր չեն պատկերացնում, թե ինչ է կատարվել, իրենք էլ ինֆորմացված լինեն:
– «Քաղաքացիական պայմանագրին» առաջին հորիզոնականում եք տեսնում…
– «Իմ քայլը» դաշինքը, ենթադրում եմ, որ առաջին տեղը կզբաղեցնի: Իմ ենթադրությունների մեջ հենվում եմ Երեւան քաղաքի ընտրությունների արդյունքների վրա:
– Ձեր իշխանությանն ուժեղ ընդդիմություն պետք չէ՞: ՀՀԿ-ն այս ընթացքում ցույց տվեց, որ ուժեղ եւ լավ ընդդիմություն կարող է լինել:
– Պետք է ուժեղ ընդդիմություն, դա միանշանակ է: Բայց ինչո՞վ ցույց տվեց ՀՀԿ-ն՝ սաբոտաժներո՞վ: Ոչ: Իրենք ցույց տվեցին, որ իրենք կառչած են իրենց աթոռներից: Ես դա պնդում եմ, ես դա կարող եմ ապացուցել՝ մեջբերելով թե՛ իրենց գործողությունները, թե՛ իրենց որոշ զրույցներ: Ես դա բոլոր ՀՀԿ-ականների մասին չեմ կարող ասել, իհարկե: Բայց երբ իրենք հայտարարում էին՝ լավ էլ աշխատում ենք իրար հետ, մնանք աշխատենք, եւ միեւնույն ժամանակ հասկանում են, որ ՀՀ-ում չունեն ժողովրդի սատարումը: Հիմա իրենք ասում են՝ այո, մենք խնդիրներ ունենք, մյուսն ասում է՝ այո, սխալներ գործեցինք, դրա համար կորցրինք իշխանությունը… Բա որ ասում եք՝ սխալներ գործեցինք, կորցրինք իշխանությունը, հանձնեք այդ իշխանությունը, թողեք գան նոր մարդիկ, թողեք, որ այն քաղաքական ուժերը, որոնք ֆինանսների, ճնշվածության պատճառով հնարավորություն չեն ունեցել, կարողանան ներկայացնել քաղաքացիներին: Ոչ, իրենք կառչած են իրենց աթոռներից, որովհետեւ իրենք միատարր քաղաքական ուժ չեն, իրենք կազմված են անհատներից, որոնց Սերժ Սարգսյանը հավաքել էր իր տանիքի տակ:
– Ձեր կարծիքով՝ ի՞նչ տեսք է ունենալու հաջորդ խորհրդարանը:
– Ենթադրում եմ, որ կկրկնվի քաղաքապետարանի պատկերը: Միգուցե «Լույս» դաշինքը ավելի բարձր տեղ կգրավի: Ենթադրում եմ, որ երկրորդ տեղի համար պայքար է գնալու «Լույս» դաշինքի եւ «Ծառուկյան» դաշինքի միջեւ:
Զրույցը՝ ՆԵԼԼԻ ԳՐԻԳՈՐՅԱՆԻ
«Առավոտ»
01.11.2018
Հավակնությունների մասին ավելի գեղեցիկ կլինի չխոսել և այդ հարցը ուղղակի թողնել ընտրողնորին: