«Բացարձակ ոչինչ չկա, իսկ Սահմանադրությունը «բացարձակ անձեռնմխելիություն» բառը չի օգտագործում»,-Aravot.am-ի հետ զրույցում անդրադառնալով ՀՀ Սահմանադրությամբ պաշտոնաթող նախագահի համար սահմանված անձեռնմխելիությանը, ասաց ՀՀ բարձրագույն դատական խորհրդի նախագահ, ՀՀ սահմանադրական դատարանի նախկին նախագահ Գագիկ Հարությունյանը։
Հիշեցնենք, որ ըստ Մարտի մեկի գործով մեղադրյալ ՀՀ երկրորդ նախագահ Ռոբերտ Քոչարյանի պաշտպանների` պաշտոնաթող նախագահը Սահմանադրությամբ ամրագրված անձեռնմխելիություն ունի եւ չի կարող ենթարկվել քրեական հետապնդման` իր կարգավիճակից բխած գործողությունների համար:
«Սահմանադրությունը հստակ ասում է, որ անձեռնմխելիությունը տարածվում է նաեւ պաշտոնաթողությունից հետո՝ իր պաշտոնեական պարտականությունների կատարմանն առնչվող հարցերի վրա: Իսկ դա նշանակում է, որ անձեռնմխելիությունը բացարձակ չէ»,-նշեց մեր զրուցակիցը:
Թեմայի շուրջ այլ հարցադրումների պատասխանել Գագիկ Հարությունյանը հրաժարվեց:
Լուիզա ՍՈՒՔԻԱՍՅԱՆ
