«Ընտրությունները կարող են անցկացվել նաեւ գործող Ընտրական օրենսգրքով, խնդիր չկա, եթե ՀՀ ԱԺ-ն որոշել է Ընտրական օրենսգրքի փոփոխությունների նախագիծը չընդունել, ուրեմն՝ պետք է ընտրությունները կազմակերպել այս օրենսգրքով, թեեւ շատ փոփոխություններ մենք դրական էինք գնահատել»,-լրագրողների հետ զրույցում այսօր անդրադառնալով փաստին, որ օրերս ԱԺ-ն դեմ քվեարկեց Ընտրական օրենսգրքում փոփոխությունների նախագծին, ասաց Եվրոպայի խորհրդի Վենետիկի հանձնաժողովի նախագահ Ջաննի Բուքիքիոն:
Բուքիքիոն վստահություն հայտնեց, որ եթե գործող իշխանությունն արտահերթ ԱԺ ընտրությունների արդյունքում խորհրդարանում մեծամասնություն կազմի, կկարողանա դրական կառավարել երկիրը. «Նիկոլ Փաշինյանի հետ իմ հանդիպումից տպավորություն ստացա, որ նրանք մտադիր են ՀՀ-ում իրավիճակ փոխել, Ընտրական օրենսգիրքը բարեփոխել: Ուստի կարծում եմ, որ ընտրություններից հետո էլ ԱԺ-ն կրկին կքննարկի ԸՕ այն բարեփոխումները, որոնք առաջարկեց նոր կառավարությունը, բայց որոնք, սակայն, չընդունվեցին»:
Ապա Ջաննի Բուքիքիոն գործող իշխանություններին կոչ հղեց՝ ԱԺ ընտրություններից հետո կրկին ձեռնարկել ԸՕ-ի բարեփոխումներն այնպես, որ գործընթացը լինի թափանցիկ. «Կարեւոր է, որ բոլոր քաղաքական ուժերի հետ երկխոսության միջոցով դա տեղի ունենա: Վենետիկի հանձնաժողովն էլ պատրաստ է օգնել՝ բարեփոխված ԸՕ ունենալուն: Ճիշտ է, ՀՀ նոր կառավարությունը դեռ շատ անելիքներ ունի, բայց ես լավատես եմ»: Պաշտոնյան նաեւ ընդգծեց Վենետիկի հանձնաժողովի մոտեցումն այն մասին, որ ԸՕ-ում փոփոխություններ պետք է արվեն ընտրություններից մեկ տարի առաջ, սակայն հանձնաժողովը դեմ չէ ստեղծված իրավիճակից բխող որոշմանը. «Մենք հաշվի ենք առնում ՀՀ-ում առկա հատուկ իրավիճակը. Վերջինիս հստակեցումն անհրաժեշտություն է»:
Լուիզա ՍՈՒՔԻԱՍՅԱՆ
