Ռուստամյանը պատասխանում է, թե որտեղ են մեղավոր, որտեղ՝ անմեղ
Վարչապետի պաշտոնակատար Նիկոլ Փաշինյանը ԱԺ-ում իր վերջին ելույթի ժամանակ հայտարարեց, որ մինչ օրս 3 փորձ է եղել՝ ռեւանշի հասնելու համար. առաջինը՝ Քոչարյանի շուրջը կոնսոլիդացվելու փորձը, երկրորդը՝ հոկտեմբերի 2-ին «ԱԺ կանոնակարգ» օրենքի ընդունման գիշերային քվեարկությունը եւ երրորդը՝ նոր «Ընտրական օրենսգրքի» տապալումը:
«Առավոտը» ՀՅԴ խմբակցության ղեկավար Արմեն Ռուստամյանին հարցրեց՝ ռեւանշի այդ 3 փորձերում ՀՅԴ-ի մասնակցությունը կա՞, Քոչարյանի հետ համագործակցությունը Հրանտ Մարգարյանը չի բացառել, «ԱԺ կանոնակարգ» օրենքի գիշերային քվեարկությանը մասնակցել եք, եւ «Ընտրական օրենսգրքի» տապալման մեջ էլ ՀՅԴ-ի մեղքը կա, հետեւաբար կարո՞ղ ենք ասել, որ ձեզ ձեռնտու է ռեւանշը, եւ դուք փորձել եք մասնակցել ռեւանշին: Նա պատասխանեց. «Հետեւաբար կարելի է ասել, որ ոչ մի ռեւանշ էլ տեղի չի ունեցել, որովհետեւ հենց առաջին հարցի հետ կապված մենք ոչ թե պաշտպանել ենք Ռոբերտ Քոչարյանին, այլ ասել ենք մի բան, որը հետագայում ավելի ամրապնդվել է եւ հաստատվել է: Այսինքն՝ Ռոբերտ Քոչարյանին կարելի է դատել տարբեր այլ հարցերով, որտեղ ունեք ավելի համոզված ապացուցողական հիմք, քան մի բանով եք դատում, որը նախ ինքը պետք է ապացուցվի՝ եղե՞լ է սահմանադրական կարգի տապալում, թե՞ չի եղել: Եվ պարզվեց, որ մենք ճիշտ ենք, եւ այդ պատճառով էլ Ռոբերտ Քոչարյանին բաց են թողել: Թող բաց չթողնեին, բա եթե իրենք ճիշտ էին: Մենք մեղադրանքի մասին ենք խոսել, որ ճիշտ մեղադրանք չեք ընդունել, ու մենք չենք պաշտպանել Քոչարյանին, այսօր էլ չենք պաշտպանում, որեւէ կապ էլ չունենք Ռոբերտ Քոչարյանի հետ»: Մենք նախ ճշտեցինք՝ ասում եք՝ դատավորը կալանքից ազատելով՝ մեր ասածը հաստատեց, այսինքն՝ դուք բացառո՞ւմ եք, որ այդ դատավորը, նախկին կապերը պահպանելով հին իշխանությունների հետ, բաց թողեց Քոչարյանին կալանքից, Ռուստամյանը պատասխանեց. «Որովհետեւ նույն դատավորը շատ լավ հասկանում է, որ ինքն է հետո պատասխան տալու: Էդպես որ լիներ, հիմա Վճռաբեկն արագ կորոշեր, հասկանո՞ւմ եք, այսինքն՝ տենց չի, էս խնդիրը հլը շատ ջուր է վերցնելու: Հետո նորից կհամոզվեն, որ այնպիսի մեղադրանք են դրել, որը բնականաբար պետք է հենց ինքը ապացուցվի եւ այդպես հեշտությամբ ապացուցվող չէր, սա՛ ենք ասում, ուրիշ ոչ մի բան»:
Ռեւանշի երկրորդ փորձի՝ գիշերային քվեարկության հետ կապված Ռուստամյանն այսպես բացատրեց. «Եթե «Կանոնակարգ օրենքը» փոխելը համարվում է ռեւանշ, ուրեմն այն, ինչ մենք անում ենք, նույն այդ Կանոնակարգ օրենքը փոխելու տրամաբանությամբ ենք անում, այսինքն՝ անում ենք բան, որ լուծարումը ԱԺ-ի չհամարվի ոչ լեգիտիմ, սա ենք անում: Մենք հիմա տեսել ենք, որ Սահմանադրության մեջ գրված է «քվեարկություն», ուրեմն պիտի քվեարկվի: Բա մենք ասում էինք՝ Քր.օր.-ում գրված է 301.1 հոդվածը, որ ԱԺ-ին չի կարելի պարտադրել որեւէ բան՝ իր լիազորությունից բխած, թե չբխած, որովհետեւ դա քրեորեն հետապնդելի է, ասում ենք՝ եթե դա տեղի ունենա, ԱԺ-ի նիստը ի՞նչ է լինելու: Մենք ասում ենք, որ այդ ԱԺ նիստը պետք է ընդհատված համարվի: Եվ այդ օրը ունեինք դա, մեր պատգամավորների կեսից ավելին չի կարողացել ԱԺ մտնել, եթե մենք դա համարում ենք նորմալ, սխալ ենք համարում, որովհետեւ դա կհամարվի, որ խոչընդոտվեց ԱԺ աշխատանքը, ու ինչպիսի որոշում էլ կայացնենք վերջում, որ դա պիտի բերի ԱԺ-ի լուծարմանը, լինելու է ոչ լեգիտիմ, ական ենք դնելու այս ընտրությունների տակ: Մենք սրանով օգնե՛լ ենք նոր ձեւավորվող իշխանությանը, նոր խորհրդարանի լեգիտիմությունն ենք ապահովել, հետո կգա ժամանակը՝ կհասկանան»:
Մեր հարցին՝ ՀՀԿ-ականներն է՞լ էին օգնել՝ չէ՞ որ դա ՀՀԿ-ի առաջարկն էր, Ռուստամյանը պատասխանեց. «Ես ՀՀԿ-ի մասին չեմ ասում, մե՛ր դիրքորոշման մասին եմ ասում: Եթե ՀՀԿ-ն բոբո է, ուրեմն ինչ ասի, պիտի չընդունե՞նք, եթե մի օր ասի՝ մածունը սպիտակ է, ես պիտի ասեմ՝ սեւ է, որովհետեւ ՀՀԿ-ականնե՞րն են ասել: Մենք այդ տրամաբանությամբ երբեք չենք շարժվել»: Հարցին՝ եթե ընդհատվեր ԱԺ նիստը, չէ՞ր ստացվի, որ չէր լուծարվի, չէր արձակվի ԱԺ-ն, Ռուստամյանը պատասխանեց. «Ոչ, դա այդպիսի բան չէր ենթադրում: Դա նշանակում էր վերացնել խոչընդոտները, երկու ժամից նորից կարող էր ԱԺ-ն հավաքվել, ի՞նչ խնդիր կար, ո՞վ է ասում անվերջ, էդ ո՞վ է տենց բան հորինել: Այսինքն՝ եթե հնարավոր չի խոչընդոտը վերացնել, այո, ուրեմն չի լինի»: Մեր դիտարկմանը, որ հենց այդ է, տարվում էր նրան, որ չլուծարվեր ԱԺ-ն, Ռուստամյանն արձագանքեց. «Դե թող բոլոր պատգամավորներին վերցնեն ձերբակալեն, օրինակ, ու ԱԺ-ի նիստը չի լինում, ի՞նչ է լինում, մեկը թող ինձ բացատրի: Կամ բոլորին գցեն «Սանիտեքի» աղբարկղերը, սենց 105 «Սանիտեքի» աղբարկղ բերեն, դնեն ստեղ, ասեն՝ սա է ժողովը, նորմա՞լ է համարվելու: Դուք ընկել եք ստեղ քվեարկությո՞ւն եք ուզում տեղի ունենա ամենապրիմիտիվ բանը ու դուք համարում եք, որ սա ճիշտ է, որովհետեւ հակառակ պարագայում պրոբլեմ կունենանք, իսկ այսպիսի բանը, որ տեղի ունենար, պրոբլեմ չէ՞ր լինի»:
Մեր դիտարկմանը՝ ամեն դեպքում այդ փորձը խափանվեց, Ռուստամյանը չհամաձայնեց. «Ոչ մի բան էլ չի խափանվել նախ, քվեարկությունը տեղի է ունեցել: Հիմա էլ ամեն մեկը պաս է տալիս մյուսի վրա, որ տեսնենք՝ ինչ կլինի: Ժամանակը կանցնի, այս օրենքը վերջը ընդունելու են, բայց այս օրենքը օգնելու է ապագա խորհրդարանին արդեն: Բա իհարկե, եթե այն ուժի մեջ մտավ, ապագա խորհրդարանի նորմալ աշխատանքն է ապահովելու սրանով»:
Մենք ռեւանշի 3-րդ փորձի մասին հարցրինք՝ Ընտրական օրենսգրքի տապալումը: Ռուստամյանն ասաց՝ «մոռացե՞լ եք, մենք քվեարկել ենք… բա որ չեք մոռացել, էդ հարցը մեզ ինչի՞ եք տալիս»: Ռուստամյանին հիշեցրինք դեռ կառավարության բերած ԸՕ փաթեթի ժամանակ իրենց քվեարկությունը. նախ՝ բողոքում էին, թե օրենսգիրքը բավարար չափով չի քննարկվել, բայց ձեռնպահ քվեարկեցին 24 ժամվա փոխարեն 72 ժամում այն ընդունելուն, ու դրանով, եթե նույնիսկ ընդունվեր օրենսգիրքը, երկրորդ ընթերցումը լինելու էր 2 շաբաթ անց, ինչը չէր տեղավորվում Փաշինյանի՝ դեկտեմբերին արտահերթ ընտրություններ անելու ծրագրի մեջ: Իսկ նախօրեին էլ, եթե ՀՅԴ-ի բացակա պատգամավորները նիստին գային ու քվեարկեին, այն կընդունվեր: Ռուստամյանը չընդունեց, որ իրենց քվեարկությունը հակասական էր. «Ձեզ է թվում հակասական: Ձեզ թվում է, թե ՀՅԴ-ի ամեն արածը հակասական է, որովհետեւ հակասությունը ձեր մեջ է, ձեր տրամաբանության մեջ է»: Հարցին՝ բա որտե՞ղ է տրամաբանությունը հատուկ ռեժիմով քննարկելուն դեմ լինել՝ ասելով, թե քիչ է քննարկման համար, ու 72 ժամում քննարկելուն ձեռնպահ քվեարկել, Ռուստամյանը պատասխանեց. «Որովհետեւ մենք հատուկ ռեժիմին դեմ ենք: Մենք ասում ենք՝ հապշտապ, ափալ-թափալ ԸՕ-ն՝ 48 ժամ կլինի, 72 ժամ կլինի, հատուկ ռեժիմով ընդունելը սխալ է: Մենք քվեարկել ենք, որպեսզի նորմալ ռեժիմով ընդունվի, որը նշանակում է 2 շաբաթվա ընթացքում մարդիկ նորմալ նստեն, քննարկեն: Եվ ի՞նչ եղավ, չընդունվեց, չէ՞: Այն ժամանակ 72 ժամը հա՜յ-հավա՜յ էր, բա էդ ո՞նց եղավ՝ մի շաբաթ անցնում է, ոչ մի պրոբլեմ չկա: Ասում էին՝ չի լինի, հրատապ է»: Դիտարկմանը, որ ձեր ասած երկշաբաթյա ժամկետը Նիկոլ Փաշինյանի ծրագրերն էր խափանում, Ռուստամյանը այստեղ համաձայնեց. «Ահա՜, ուրեմն հարցրեք Նիկոլ Փաշինյանին, ինչո՞ւ է ընենց ծրագիր դնում, որ ամեն ինչ արհեստական դառնա էս երկրում, ու ամեն ինչ հարմարեցվի դրան, ինչի՞ է դրել անպայման երկու ոտը մի կոշիկի մեջ ու դեկտեմբեր ֆիքսել, որ էս պրոբլեմներն էլ առաջանան»:
ՀՌԻՓՍԻՄԵ ՋԵԲԵՋՅԱՆ
«Առավոտ»
31.10.2018
