Ուսումնասիրելով բազկամարտի աշխարհի չեմպիոն, մայոր Սարգիս Ստեփանյանի անցած ուղին և ներկայիս ձեռքբերումները, որոշեցի՝ պետք է անպայման ծանոթանամ նրա հետ: Հարցազրույցի վայրը «Լեգենդներ» մարզասրահն էր, որը հիմնվել է Սարգիսի և ընկերների ջանքերով:
Հենց առաջին րոպեից Սարգիսը, ժպիտը դեմքին, ստեղծեց անմիջական ու անկաշկանդ մթնոլորտ:
2014 թվականին Արցախում մարտական ընկերոջը փրկելու համար, նա մտնում է ականապատ տարածք և արկի պայթյունի պատճառով կորցնում ոտքերն ու մի ձեռքը:
Մոտ մեկ տարի բուժվելուց հետո Սարգիսը մտածում է, որ պետք է շարունակի ապրել այնպես, ինչպես նախկինում:
«Շատ դժվարություններ են եղել այդ ընթացքում, սակայն դրանք նրա համար են, որ կարողանաս հաղթահարել: Ես միշտ փորձել եմ շարժվել առաջ: Լացելով ոչնչի չես հասնի, եթե իմանայի, որ դա ինչ-որ բան կփոխի, առաջին լացկանը ես կլինեի»,- ասում է նա:
Սարգիսն իր զինակից ու մարզական ընկերների հետ որոշում է ստեղծել մի կառույց, որը հաշմանդամություն ունեցող անձանց հնարավորություն կտա մարզվել և կյանքում որոշակի հաջողությունների հասնել:
«Գաղափարը եղել է դեռ 2015 թվականից: Երբ գնում էինք աշխարհի և Եվրոպայի առաջնությունների, մարզիչիս՝ Արտավազդ Նալբանդյանի հետ մտածում էինք, որ Հայաստանում պետք է ստեղծել այնպիսի մարզասրահ, որը հարմարեցված կլինի հաշմանդամություն ունեցող մարդկանց»,- ասում է նա:
Սարգիսն իր սեփական հաջողություններով օրինակ է ծառայել մնացած մարզիկներին՝ դառնալով Եվրոպայի և աշխարհի չեմպիոն, ըստ նրա, այդքանից հետո միայն իրավունք ուներ հանձն առնել և ստեղծել Հաշմանդամային սպորտի ֆեդերացիա: Եվ արդեն 2018 թվականի հունիսին գաղափարն իրագործվեց:
Ֆեդերացիայի անունն ընդհանրական է՝Հաշմանդամային սպորտի ֆեդերացիա, նպատակն է չսահմանափակվել միայն մեկ մարզաձևով, ներառել այլ մարզաձևեր ևս:
Ֆեդերացիային կից «Լեգենդներ» մարզասրահն է. անունը պատահական չի ընտրված, ըստ Սարգիսի՝մարզասրահից հետագայում լեգենդներ են դուրս գալու:
Մի քանի ամիս գործող ֆեդերացիան արդեն տվել է այնպիսի մարզիկներ, ովքեր բավականին լուրջ արդյունքներ են գրանցել: Վերջերս էլ Թուրքիայում բազկամարտի աշխարհի չեմպիոն է դարձել Խաչատուր Սարիբեկյանը:
Հայաստանում մոտ մեկ ամիս առաջ Ուժային եռամարտի և Հաշմանդամային սպորտի ֆեդերացիաների միջև անցկացվել է սեղմում հենարանից սպորտաձևի Հայաստանի առաջնությունը, որը եղել է միջազգային չափորոշիչներին համապատասխան:
Օրեցօր ավելանում է մարզասրահ հաճախող մարզիկների թիվը, նրանց մեջ սերմանվում է հաղթող լինելու գաղափարը:
«Մեր շեմ ոտք դնող յուրաքանչյուր մարզիկ թույլ լինելու իրավունք չունի:Եթե մեր միջավայրում են, ուրեմն մեր գաղափարակիցն են: Առաջին հերթին մենք սովորեցնում ենք հաղթահարել դժվարությունները: Կարևոր չէ, թե դու ֆիզիկական ինչ խնդիր ունես, կարևորն այն է, որ կարողանաս սթափ մտածել և ճիշտ գնահատել կյանքը: Երբ որ հոգով ուժեղ ես և դրան գումարվում է ֆիզիկականը, դու պարզապես անկոտրում ես դառնում»,-ասում է Սարգիսը:
Մարզասրահը հնարավորինս փորձել են հարմարեցնել հաշմանդամություն ունեցող մարզիկներին, այնտեղ տիրող ջերմ մթնոլորտն էլ ավելի է նպաստում միջավայրին հեշտ ինտեգրվելուն:
Հայաստանում գործող որևէ սպորտային կառույցից ֆեդերացիան չի ստանում օժանդակություն, միայն Ամերիկայում գործող «Հայ վիրավոր հերոսներ հիմնադրամն» (Armenian Waunded Heroes Fund) է այսքան ժամանակ աջակցել և միշտ եղել ֆեդերացիայի կողքին:
Այժմ մարզիկները պատրաստվում են նոյեմբերի 16-21-ը Լեհաստանում կայանալիք Աշխարհի գավաթի առաջնությանը:Սարգիս Ստեփանյանը նույնպես մասնակցելու է: Չնայած ձեռքի հետ կապված որոշ խնդիրներին, վստահ է, որ կհաղթի, ասում է՝ պարտվել չկա, պարտվելը մերը չէ:
Աննա ԲԶՆՈՒՆԻ
Նկարները Սարգիս Ստեփանյանի անձնական արխիվից
