«ՀՀ քաղաքացիները նոր իշխանությունների կողմից կատարված բացահայտումներից ամենաշատը հիշում են Մանվել Գրիգորյանի հետ կապված դեպքերը»,-այս մասին լրագրողների հետ զրույցում ասաց «GALLUP International association»-ի Հայաստանում լիիրավ անդամ «Էմ Փի ՋԻ» ՍՊԸ-Ի տնօրեն Արամ Նավասարդյանը։
Նրա խոսքով՝ իրենց կազմակերպության կողմից իրականացված հարցումների արդյունքում, պարզ է դարձել, որ հարցման մասնակիցների 83,3%-ը նոր իշխանությունների կողմից կատարված բացահայտումներից հիշում է Մանվել Գրիգորյանի հետ կապված դեպքը։
Հարցման մասնակիցների 39,9% հիշում է Ռոբերտ Քոչարյանի՝ մարտի 1-ի առնչությամբ դեպքը, 37,5%-ը՝ Ալեքսանդր Սարգսյանի և նրա որդիների հետ կապված ենթադրյալ հանցագործությունները, 18,9%-ը՝ Հովիկ Աբրահամյանի և իր եղբոր գործարանում գտնված զենքերն ու չարաշահումները, 9,2%-ը՝ Վաչիկ Ղազարյանի հետ կապված գործը, իսկ 5,2%-ը՝ «Երևան» հիմնադրամի առնչությամբ բացահայտումները։
Խոսելով մարտի 1-ի մասին, նա ասաց, որ, նաև, հարցում է իրականացվել, թե ինչպիսի հանգուցալուծում կստանա մարտի 1-ի գործը, և՝ ով պետք է հարցաքննության կանչվի։
Հարցվածների 64,8%-ի կարծիքով վերջնական քննությունը կպարզի ճշմարտությունը, և մեղավորները կկրեն պատիժը, իսկ ըստ 24,7%-ի մեղավորները կկարողանան խուսափել պատժից։
Խոսելով այն մասին, թե ով հարցաքննության պետք է կանչվի՝ Նազարյանն հայտնեց, որ հարցման մասնակիցների 86,3%-ի կարծիքով հարցաքննության պետք է կանչվեն նախկին իշխանությունները, մասնավորապես Սերժ Սարգսյանը, Ռոբերտ Քոչարյանը և թիմի այլ ներկայացուցիչներ։
Իսկ 52,4%-ի համոզմամբ պետք է հարցաքննվեն Լևոն Տեր-Պետրոսյանն ու ընդդիմադիր այլ գործիչներ։
Նշենք, որ հարցումն իրականացվել է սեպտեմբերի 3-11-ը՝ ամբողջ հանրապետության տարածքում: Դրան մասնակցել է 1106 մարդ։
Սոնա ԳԵՎՈՐԳՅԱՆ
