Հոկտեմբերի 24-ին՝ Ստրասբուրգում, կայացել է ՀՀ-ԵՄ խորհրդարանական գործընկերության կոմիտեի առաջին նիստը: ՀՀ-ԵՄ խորհրդարանական նման ձեւաչափը ամրագրվում է ԵՄ-ի եւ ՀՀ-ի միջեւ ստորագրված Համապարփակ եւ ընդլայնված գործընկերության համաձայնագրով`CEPA-ով:
Կոմիտե`հայկական պատվիրակության ղեկավար Արմեն Աշոտյանը խորհրդարանական դիվանագիտության տեսակետից, պատմական է որակում այդ նիստը, քանի որ ԵՄ-ՀՀ նաեւ խորհրդարանական համագործակցության ձեւաչափն առաջիկա 15 տարիների համար պայմանավորված է լինելու CEPA-ով: Այսօր այս առիթով, խորհրդարանում հրավիրված մամուլի ասուլիսում, Արմեն Աշոտյանը նաեւ նկատեց, որ այդ նիստն ինչ-որ առումով նաեւ «ավարտական երեկո» էր թե ՀՀ-ի, համար, թե ԵԽ-ի, քանի որ առաջիկայում ընտրություններ են եւ ՀՀ-ում, եւ ԵԽ-ում. գործող կազմերով վերջին հանդիպումն էր սա: Արմեն Աշոտյանը ԵՄ-ի հետ հարաբերությունները կարեւորում է ոչ միայն գործադիրի, այլ նաեւ խորհրդարանական մակարդակում: Վերոնշյալ կոմիտեն վերահսկողական-մոնիտորինգային գործառույթ է ունենալու:
Կոմիտեի նիստում ընդունված բանաձեւում երեք կետերով ամրագրում կա ԼՂՀ հարցին վերաբերվող: Արմեն Աշոտյանը «համապարփակ» է որակում դրանք: Փաստաթղթի 29-րդ կետով ափսոսանք է հայտնվում Լեռնային Ղարաբաղի հակամարտության հետևանքով շարունակվող մարդկային կորուստների համար։ Կոմիտեն նաև խորապես մտահոգված է հրադադարի ռեժիմի շուրջ ձեռք բերված համաձայնության պարբերական խախտումների կապակցությամբ, որոնք շարունակաբար խլում են ինչպես զինծառայողների, այնպես էլ քաղաքացիական անձանց կյանքեր՝ խոչընդոտելով ողջ տարածաշրջանի սոցիալ-տնտեսական զարգացմանը։ Կոմիտեն նաև ընդունում է, որ ներկայիս status quo-ն ընդունելի է և՛ ոչ էլ կայուն, և՛ հակամարտության կայուն ռազմական լուծում չի կարող ունենալ։
34-րդ կետով էլ ԵՄ անդամ երկրներին կոչ է արվում`ճանաչել հայոց Ցեղասպանությունը:
Այլ մանրամասները՝ տեսանյութում
Արմեն Աշոտյանը CEPA-ի վավերացումն արագացնելու կոչն է կարեւորում: Համաձայնագրի ստորագրումից մեկ տարի անց ինքը վավերացման արագությունը բավարար չի համարում: «CEPA-ն պետք է ստանա լիարժեք իրավական ուժ, որպեսզի հաջողության պատմությունը հասցվի իր բնական ավարտին`ամրապնդելով ՀՀ-ի դիրքերը`անկախ օրվա իշխանությունից»,- ասաց Արմեն Աշոտյանը:
Վիզաների ազատականացման հետ կապված աշխատանքներ են տարվել:
Արմեն Աշոտյանն իր գլխավորած պատվիրակության կատարած ողջ աշխատանքը լավ ժառանգություն է համարում հաջորդ խորհրդարանական պատվիրակության համար: «Մենք թողնում ենք լավ ժառանգություն, բայց դա չի նշանակում, որ պատրաստվում ենք գնալ»,- ասաց նա:
Ի դեպ, Արմեն Աշոտյանը հատուկ ընդգծեց`զերծ է մնացել փաստաթղթի`ներքաղաքական մասով ավելի կոշտ ձեւակերպումներից, թեեւ դրանք ստանալու հնարավորություն ունեցել է:
Այլ մանրամասները`տեսանյութում
Նելլի ԳՐԻԳՈՐՅԱՆ
