Աղքատության շեմը բարձրացնելու նպատակով նպաստների եւ կենսաթոշակների չափը վերանայելու ուղղությամբ ՀՀ աշխատանքի եւ սոցիալական հարցերի նախարարությունը որոշակի քայլեր է ձեռնարկում, մասնավորապես՝ որոշ դրամական հատկացումներ վերանայվում են: Այս մասին այսօր լրագրողների հետ ճեպազրույցում ասաց ՀՀ աշխատանքի եւ սոցիալական հարցերի նախարարի պաշտոնակատար Մանե Թանդիլյանը: «Սոցիալական պաշտպանության համակարգի վերանայման խնդիր ունենք»,-նշեց նա:
«Աղքատությունը մեղմելու ուղղությամբ աշխատանքներ ենք տանում, թեեւ հարցի շուրջ նաեւ հեղափոխական մոտեցումներ կան, որոնց կանդրադառնամ որոշ ժամանակ անց, որովհետեւ հասարակությունը սովոր է ուղիղ դրամական միջոցների հատկացմանը, քան թե աղքատության վերացմանն ուղղված ծառայությունների մատուցման միջոցով սեփական ներուժը վերականգնելուն: Սա փիլիսոփայություն է, որը հասարակության համար դեռ պարզ չէ»,-նկատեց նա:
Անդրադառնալով պաշտոնական վիճակագրական տվյալներին, որ ՀՀ բնակչության 30%-ն աղքատ է, Մանե Թանդիլյանը հայտնեց, որ մտադիր են աստիճանաբար կրճատել աղքատության շեմը՝ սկսելով տարեկան 0,5%-ից. «Սա դեռ քննարկվում է: Պետք է իրատես լինենք: Մեր քայլերը միայն սոցիալական ոլորտին չեն վերաբերում, այլ տնտեսությանն առհասարակ: Կան միջոցներ, որոնք հնարավոր է ձեռնարկել, բայց դրանք քննարկման փուլում են»:
Լուիզա ՍՈՒՔԻԱՍՅԱՆ
