«Ես ԱՄՆ-ի փոխարտգործնախարարը չեմ, այլ ՀՀ-ի, ուստի պարոն Բոլթոնի հայտարարությունը մեկնաբանել չեմ ուզում: Միայն կարող եմ ասել, որ Արցախի հարցի ցանկացած լուծում պետք է լինի համաձայնեցված եւ ընդունելի՝ ՀՀ-ի եւ Արցախի ժողովուրդների համար»,-լրագրողների հետ զրույցում այսօր անդրադառնալով ԱՄՆ նախագահի ազգային անվտանգության հարցերով խորհրդական Ջոն Բոլթոնի այն հայտարարությանը, որ սպասվելիք արտահերթ ԱԺ ընտրություններում վճռորոշ մանդատ ստանալու դեպքում Նիկոլ Փաշինյանը կարող է նույնքան վճռորոշ քայլեր ձեռնարկել՝ Արցախի հարցի լուծման համար, ասաց ՀՀ փոխարտգործնախարար Ռուբեն Ռուբինյանը:
«Իսկ թե որ սկզբունքներն են հայկական կողմի համար ընդունելի Արցախի հարցի լուծման շրջանակներում, հայտնի են բոլորին, քանի որ նոր կառավարությունը, այդ թվում՝ վարչապետը, քանիցս հայտարարել է իր մոտեցումների մասին»,-ընդգծեց Ռուբեն Ռուբինյանը: Հարցին՝ «Բոլթոնի հայտարարությունում վտանգ տեսնո՞ւմ եք», Ռուբինյանը պատասխանեց՝ «բոլորովին»:
Լուիզա ՍՈՒՔԻԱՍՅԱՆ
