«Ատելության քարոզը քաղաքական մանիպուլյացիաների համատեքստում». այսօր այս թեմայով քննարկման ժամանակ «Համագործակցություն հանուն ժողովրդավարության» կենտրոնի նախագահ Ստեփան Դանիելյանը (լուսանկարում՝ աջից) բացահայտեց, թե ինչ հիմնավորմամբ են ՀՀ վարչապետի աշխատակազմի գործերի նախկին կառավարիչ Գեւորգ Աճեմյանին հանել աշխատանքից: Հիշեցնենք, որ Աճեմյանը, այն քննադատությունից հետո, որ վարչապետի աշխատակազմի գործերի կառավարիչն աղանդավոր է, հաստատեց դա՝ ասելով՝ «Ես այդ դավանանքի հետևորդ եմ, ես «Կյանքի խոսք» եկեղեցուց եմ, իմ հավատքը դա է»։
Այսօր Ստեփան Դանիելյանը, խոսելով այդ դեպքի մասին, ասաց. «Վարչապետը որեւէ խնդիր չի ունեցել նման մարդու դնել այդ պաշտոնին՝ շատ կարեւոր պաշտոնին: Բայց ինչ է կատարվել, ես ձեզ ասում եմ ներքին ինֆորմացիա, ինֆորմացիայի աղբյուրները չեմ ասի: Այդ տղային ասել են, հասկացրել են, որ պետք է հրաժարական տա: Բնական է, ավելի պատվաբեր է ոչ թե գործից հանեն, այլ հրաժարական տա: Ձեւակերպումը եղել է հետեւյալը՝ ընտրություններ են լինելու, քո բերած ձայներն ավելի քիչ են լինելու, քան այն ձայները, որոնք մենք քո պատճառով կորցնելու ենք: Բնական է, «Կյանքի խոսքից» ձայեր կլինեին, բայց կորուստը կլիներ շատ ավելի մեծ»:
Դանիելյանն ասաց, որ սա չի ասում՝ որպես մեղադրանք, ով էլ գնա ընտրության, կփորձի այդ հաշվարկները կատարել:
Հռիփսիմե ՋԵԲԵՋՅԱՆ
