ԱՄՆ նախագահի Ազգային անվտանգության հարցերով խորհրդական Ջոն Բոլթոնը մինչ Երեւան այցելելը Բաքվում հայտարարել էր, թե ԼՂ խնդրի կարգավորումը ռազմավարական տեսանկյունից կարեւոր նշանակություն ունի ԱՄՆ-ի համար, իսկ Երեւանում ասաց՝ ԼՂ հակամարտության կարգավորումը բխում է ոչ միայն Հայաստանի եւ Ադրբեջանի, այլեւ ԱՄՆ-ի շահերից:
Կարո՞ղ ենք արձանագրել, որ Վաշինգտոնն էլ կփորձի առանձին դերակատարություն ստանձնել կողմերի հետ աշխատանքում, ինչպես դա ռուսական կողմն է ժամանակ առ ժամանակ դրսեւորում, թե՞ կսահմանափակվի ԵԱՀԿ Մինսկի խմբի շրջանակներում ակտիվ գործունեությանը, հարցրեցինք Ժողովրդավարության, անվտանգության եւ զարգացման հայկական կենտրոնի փորձագետ Մարթա Այվազյանին:
«ԱՄՆ-ի շահերից է բխում, որպեսզի Հրավային Կովկասը լինի ինքնիշխան պետությունների խաղաղ, հակամարտություններից ազատ գոտի: Սակայն այս մոտեցումը մեծագույնս համապատասխանում է նախ եւ առաջ հարավկովկասյան պետությունների, մասնավորապես Հայաստանի շահերին: Կարող եմ ենթադրել, որ ներկայիս պայմաններում ԱՄՆ-ն կավելացնի իր ներգրավվածությունը ԼՂ-ի հակամարտության կարգավորման գործում զուգորդելով երկու տարբեր մոտեցում: Մի կողմից նա կակտիվացնի իր գործունեությունը Մինսկի խմբի շրջանակներում, մյուս կողմից կաշխատի ստեղծել այլ, մասնավորապես տնտեսական լծակներ, ձեւաչափեր, որոնց միջոցով կփորձի հակամարտության կարգավորման գործընթացը մասնակիորեն տեղափոխել տնտեսական համագործակցության հարթակ, հակամարտող կողմերի համար շոշափելի դարձնել իրենց ընդհանուր տնտեսական շահերը, եւ այդ ճանապարհով փորձել հասնել կողմերի հաշտեցմանը», պատասխանեց մեր զրուցակիցը:
«Ժամանակին ԱՄՆ-ին հաջողվել է Մարշալի պլանով նախատեսված օգնության եւ տնտեսական սերտ համագործակցության միջոցով ոչ միայն վերականգնել, այլ նաեւ հիմք դնել Եվրոպայում երկարաժամկետ խաղաղության եւ կայուն զարգացման: Ամեն դեպքում հակամարտության կարգավորման այս ճանապարհը, եթե այն կիրառվի, նույնպես կարող է ունենալ պարտադրանքի որոշակի բաղադրիչ: Սակայն այս անգամ այդ պարտադրանքը կլինի ոչ թե Ռուսաստանի, այլ Միացյալ Նահանգների կողմից», հավելեց մեր զրուցակիցը:
Ժողովրդավարության, անվտանգության եւ զարգացման հայկական կենտրոնի փորձագետ Մարթա Այվազյանի հետ հարցազրույցն ամբողջությամբ՝ կարդացեք նոյեմբերի 1-ի տպագիր «Առավոտ»-ում:
ԷՄՄԱ ԳԱԲՐԻԵԼՅԱՆ
