Ռուսաստանի ԱԳՆ-ն «աննրբանկատություն» է անվանել ԱՄՆ նախագահի ազգային անվտանգության հարցերով խորհրդական Ջոն Բոլթոնի հայտարարությունն այն մասին, որ Հայաստանն ավելի լավ է ամերիկյան զենք գնի:
Ինչպես հաղորդում է «ՌԻԱ Նովոստին», գերատեսչությունում Բոլթոնի այդ խոսքերը համեմատել են Երևանում ԱՄՆ նախկին դեսպան Ռիչարդ Միլսի՝ ավելի վաղ արված հայտարարության հետ, որում դիվանագետը խոսում էր Վաշինգտոնի կողմից Հայաստանի որոշակի խմբերին տրամադրվող տևական նպատակաուղղված աջակցության մասին: Նա նաև խոստացել էր երկրին տրամադրել 26 մլն դոլար՝ քաղհասարակւթյան և ԶԼՄ-ների ամրապնդման համար:
«Թվում էր՝ ավելի մեծ աննրբանկատություն, որը չի տարբերվում ներքին գործերին ուղղակի միջամտությունից, չէր կարող լինել: Պարզվում է՝ այդպես չէ»,- ասել են գերատեսչությունից:
Նշվում է, որ Բոլթոնը «պահանջել է, որ Հայաստանը հրաժարվի «միջազգային հարաբերություններում իր «պատմական կլիշեից»՝ հատկապես չթաքցնելով, որ խոսքը Ռուսաստանի հետ ավանդական բարեկամության մասին է»:
«Նա նաև հայտարարել է, որ երկրում խորհրդարանական ընտրություններից հետո Փաշինյանից ակնկալում է նախաձեռնողական քայլեր Լեռնային Ղարաբաղի կարգավորման ուղղությամբ: Բնականաբար, չի մոռացել գովազդել ամերիկյան զենքը, որը Հայաստանը լավ կանի գնել ռուսականի փոխարեն»,- ասվում է գերատեսչության հայտարարության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
