Այսօր աշխատանքային այցով Գյումրու թիվ 15 դպրոց այցելած կրթության և գիտության նախարարի պաշտոնակատար Արայիկ Հարությունյանից լրագրողները հետաքրքրվեցին, թե ինչո՞ւ է պակասել հետաքրքրությունը դպրոցի տնօրենի պաշտոնի նկատմամբ, մի՞թե պատճառն այն է, որ, այսպես ասած, չեն ուզում «չոր ռոճիկով» աշխատել։
«Իհարկե, չեն ուզում աշխատել չոր ռոճիկով ու այսուհետ աշխատանքի կգնան իրական նվիրյալները։ Մենք իհարկե, հասկանում ենք, որ աշխատավարձերը ցածր են, բայց կառավարությունը հետագայում միջոցներ կձեռնարկի աշխատավարձերը բարձրացնելու։ Ես մի օրինակ կարող եմ բերել, երկու շաբաթ առաջ գտնվում էի Գերմանիայի Դաշնությունում, պիտի ասեմ, որ այնտեղ էլ տնօրենների համար արդեն քչերն են դիմում, ուսուցիչների թափուր պաշտոնների համար՝ բազմաթիվ դիմումներ։ Այսինքն հանրակրթության ոլորտում առկա խնդիրները, որոնք կան Հայաստանում, բնորոշ են ընդհանուր համաշխարհային տենդենցներին, բայց, իհարկե. մեզ մոտ դրանք երբեմն ունեն այլ բնույթ ունեն և երբեմն ավելի խորքային են», -ասաց Արայիկ Հարությունյանը։
Նա անդրադաձավ նաև ՀՀ պետական վերահսկողական ծառայության կողմից ԵՊՀ-ում ու Ագրարային համալսարանում արձանագրած չարաշահումներին, խոսեց դպրոցները քաղաքականությունից զերծ պահելու մասին։ Անդրադարձավ նաև Գյումրու թիվ 37 դպրոցի տնօրենի ընտրությանը, Շիրակի պետական համալսարանից ու Երևանի պետական կոնսերվատորիայի Գյումրու մասնաճյուղից նախարարությանը հասցեագրվող բողոքներին։
Նունե ԱՐԵՎՇԱՏՅԱՆ
