Ինչպես արդեն տեղեկացրել ենք, այսօր ԱԺ արտահերթ նիստում «Ընտրական օրենսգրքի» նախագիծը նորից չընդունվեց: Մինչ քվեարկությունը իր ելույթում ՀՀԿ պատգամավոր, ԱԺ արտաքին հարաբերությունների հանձնաժողովի նախագահ Արմեն Աշոտյանը խոսեց, թե կառավարության հրավիրած արտահերթում մեկ շաբաթ առաջ ԸՕ նախագիծը «անփառունակ տապալվեց»: Նրա խոսքով՝ «Ընտրական օրենսգիրքը դռներից հանեցինք, ծխնելույզից նորից մտավ խորհրդարան»: Աշոտյանի ելույթին արձագանքեց «Ելք» խմբակցության պատգամավոր Ալեն Սիմոնյանը:
Նա ասաց. «Ով-ով՝ ժամկետներից խոսալուց եւ ընտրություններից առաջ օրենք փոխելուց դուք պետք է չխոսեք, որովհետեւ Սերժ Սարգսյանի ժամկետն ավարտվելուց առաջ դուք ոչ թե «Ընտրական օրենսգրքի», այլ նույնիսկ Սահմանադրության փոփոխությամբ հանդես եկաք, որպեսզի Սերժ Սարգսյանը հնարավորություն ունենա շարունակել: Այստեղ-այնտեղ ժողովրդավարությունից խոսելիս, ժողովրդավար երկրներին դիմելիս հիշեք ձեր արածները՝ երրորդ անգամ Հայաստանը ադրբեջանացնելու եւ նման նախադեպ ստեղծելու ձեր փորձերը»:
Աշոտյանն ասել էր, որ հոկտեմբերի 2-ի շարունակությունն է ԱԺ-ում, իրենք պատանդ են: Ալեն Սիմոնյանի խոսքով՝ դա ոչ թե պատգամավորներին ճնշելու, այլ հակահեղափոխության փորձ էր ու եթե ԱԺ-ն պաշարված է, ապա պաշարված է ժողովրդավարությամբ, պաշարված է ժողովրդով. «Սա ՀՀ Ազգային ժողովն է, ոչ թե ՀՀԿ-ի, կամ ինչպես դուք արդարացիորեն նշեցիք, այն մարդկանց, ովքեր ժամանակին ձեր ձայնն են ապահովել, դուքանն է: Այն, ինչ կատարվում է այսօր ՀՀ-ում, ժողովրդավարության սկիզբն է, ժողովրդավարության գագաթնակետն է, վայելե՛ք ուղղակի»:
Նա ասաց, որ ԸՕ բարեփոխումները չեն բերել, որ ինքը կամ Լենա Նազարյանն անցնեն խորհրդարան. «Բերել ենք, որ քաղաքական այն դաշտը, որը դուք ձեր գործընկերների հետ, ձեր ցինիկ ելույթներով, հաղորդումներով ու ձեր հարցազրույցներով ոչնչացրել եք, նորից հնարավորություն ունենա վերականգնվելու: Մենք այլ խնդիր չունենք: Ուզում եք քվեարկեք, ուզում եք՝ մի քվեարկեք, ժողովուրդը ձեզ համար արդեն որոշել է, որ չի քվեարկելու: Ես հասկանում եմ վերջին մոհիկանի եւ վերջին վատություն անելու ձեր ցանկությունը, բայց դուք դրանով պատմության մեջ չեք մնալու, պարոն Աշոտյան»:
Հռիփսիմե ՋԵԲԵՋՅԱՆ
