«Հնարավոր չէ կարծիք ասել մի բանի մասին, որը դեռ չգիտես՝ ի՞նչ է: Անցումային իրավիճակներում նոր խնդիրներ են ծագում, որոնք լուծման գործիքակազմեր են պահանջում: Տարբեր երկրներում այդ խնդիրները տարբեր են եղել եւ տարբեր լուծումներ են գտել»,-լրագրողների հետ հանդիպմանն այսօր անդրադառնալով ՀՀ վարչապետի ԺՊ Նիկոլ Փաշինյանի՝ անցումային արդարադատության մարմիններ ստեղծելու անհրաժեշտության մասին ավելի վաղ արած հայտարարությանը, ասաց ՀՀ Բարձրագույն դատական խորհրդի նախագահ, Սահմանադրական դատարանի նախկին նախագահ Գագիկ Հարությունյանը: Նրա բնորոշմամբ՝ դասական իմաստով անցումային արդարադատությունը լուծում է հասարակական համերաշխության եւ իրավունքների համատարած պաշտպանվածության խնդիրները:
«Եվրոպական երկրներում անցումային արդարադատությունը նոր մոտեցումներ է առաջադրել՝ սահմանադրական պատասխանատվության բարձրացման ուղղությամբ: Լեհաստանում եւ Հունաստանում, օրինակ, սահմանադրական պատասխանատվության համակարգ գործարկեցին: Ես ինքս ժամանակին առաջարկել եմ դա արմատավորել նաեւ մեր նոր Սահմանադրության մեջ, բայց վերջինիս մշակման ժամանակ ինձ հետ մեծամասամբ չհամաձայնեցին: Եթե Ֆրանսիայի եւ Բելգիայի պես երկրներն 98 թվականին նման համակարգ են մտցրել, ինչո՞ւ մենք էլ դրան ուշադրություն չդարձնենք»:
Գագիկ Հարությունյանն ասաց, որ առաջարկում է ՀՀ Սահմանադրությամբ ամրագրել սահմանադրական պատասխանատվության եւ հակակոռուպցիոն արդարադատության մասնագիտացված դատարանների գոյությունը. «Դրանց ստեղծումը ներկայիս սահմանադրությունը թույլատրում է: Խնդիրը ոչ թե տերմինն է, այլ անցումային խնդիրների լուծման համապատասխան գործիքակազմը»:
Լուիզա ՍՈՒՔԻԱՍՅԱՆ
