Մանկավարժ
Հակոբ Թադևոսյանի խոսքը
«Բարեփոխումների աջակցության հանրային նախաձեռնության» կազմակերպած «Հանրակրթության ոլորտի խնդիրները եւ լուծումները» թեմայով հանդիպում-քննարկման ժամանակ
Համակարգային լուրջ փոփոխությունները, որ կբավարարեն բոլորիս ցանկություններն ու պատկերացումները, այսօր այնքան էլ իրատեսական չեն եւ ես չեմ տեսնում կրթության որեւէ համակարգ, որ ինչ- որ տեղից կարելի է վերցնել եւ ներդնել Հայաստանում: Յուրաքանչյուրս մեր տեղում պետք է անենք փոփոխությունները, որ անհրաժեշտ են համակարգի առողջացման համար:
Վերջին տարիներին Մանկավարժական համալսարանում, օրինակ, բավականին մեծ փոփոխություններ են եղել: Լսարանային դասընթացների համամասնությունն ենք փոխել, առարկաներ ունենք, որոնց գործնականի ժամաքանակը ավելացված է: Պրակտիկային տրվել է բավականին մեծ ժամաքանակ: Երկրորդ կուրսից սկսած շաբաթվա մեկ օրը տրամադրվում է պրակտիկային: Երրորդ – չորրորդ կուրսերում ունենք երկարաժամկետ պրակտիկա, որոնց համար մշակված են հատուկ ծրագրեր, որոնք պետք է համապատասխանեն տվյալ մասնագիտության մասնագրով հաստատված վերջնարդյունքներին: Ընդ որում, վերջնարդյունքները կազմվում են այնպես, որ դրանք չափելի լինեն: Դրա համար համապատասխան գործիքներ են ներդրվել: Պրակտիկայի արդյունքները նաեւ ներկայացվում են պաշտպանությունների տեսքով:
Պրակտիկ կարողությունների գնահատումը պետական ավարտական քննությունների ժամանակ 30 տոկոս ենք դարձրել: Ցանկացած առաջադրանք, ի դեպ, չի տրվում պարզ մեխանիկական վերաարտադրության նպատակով: Թող բերի ուսանողը ոչ թե 50 էջ, այլ հինգ էջ դիպլոմային աշխատանք, որը, սակայն, կլինի ինքնուրույն եւ պրակտիկ խնդրի լուծման առաջարկներով: Բակալավրիատում մեծ ուշադրություն է դարձվում հետազոտական բաղադրիչի վրա: Սա, իհարկե, մանկավարժի պատրաստման գործընթացում ամենափայլուն լուծումներն չեն, բայց սա իմ գնահատմամբ թռիչքաձեւ քայլ է: Այս փոփոխություններով փորձում ենք ձեւավորել եւ գնահատել այն պահանջարկը, որ կա աշխատաշուկայում:
Մանկավարժական համալսարանում խիստ կարեւորվում է նաեւ երեխայի վրա շեշտադրումը: Բուհական առարկայի նկարագիր գրելիս, վերջնարդյունքները ձեւակերպելիս հաշվառվում է, թե մասնագետը դպրոցում երեխայի հետ աշխատանքում ի՞նչ որակներ պետք է ձեւավորի, ի՞նչ հմտություններ են իրեն պետք: Որպեսզի այդ վերջնարդյունքը գրենք դրանից բխող թեմաների, պարապմունքերի ուղղություններ: Վերջին տարիների մեր փորձը ցույց է տալիս, որ հաջողություններ ունենք: Այս համակարգը նոր ենք ներդրել, մի քանի տարի հետո, վստահ եմ, կտեսնենք արդյունքը
