Այսօր տարբեր տարիքային խմբերի շուրջ 150 սիրողական վազորդներ մրցեցին Ծիծեռնակաբերդի ծառուղիներում:
Նախաձեռնության հեղինակը Հայաստանի հավաքականի նախկին անդամ Ամալյա Շառոյանն է, որը որպես մարզիչ-մանկավարժ վերջերս վերապատրաստվել է Գերմանիայում: Նա Aravot.am-ի հետ զրույցում ասաց. «Այս միտքը ծնվեց երեխաների մեջ աթլետիկայի նկատմամբ սեր արթնացնելու համար: Այլ երկրներում հատկապես երեխաների համար այսպիսի մեկնարկներ շատ են կազմակերպվում: Այս առումով մեր մոտ աթլետիկան խեղճ վիճակում է. Սպորտի թագուհի մարզաձեւի նկատմամբ երեխաների մեջ սեր ու ցանկություն չկա, մասսայական ու առողջ ապրելակերպի մեկնարկներ հազվադեպ են կազմակերպվում: Ուզում եմ, որպեսզի աթլետիկան էլ ակտիվանա, ինչպես ֆուտբոլն ու մյուս մարզաձեւերը:
Առաջին անգամ անցկացվող սիրողական այս միջոցառման առիթը Երեւանի 2800-ամյակն է: Մենք հայտեր ուղարկել ենք մարզեր, Գյումրի, Վանաձոր, Արտաշատ, աթլետիկայի մարզադպրոցներ եւ Արցախ: Շատերն արձագանքել են, ու այսօր մեկնարկի կելնի, կարծում եմ, 150-ից ավելի մարդ: Ի դեպ, վազելու հայտ ներկայացրել են նաեւ այլ մարզաձեւերի՝ ըմբշամարտի, բռնցքամարտի, լողի ներկայացուցիչներ: Լինելու են վեց տարիքային խմբի մեկնարկներ: Յուրաքանչյուր տարիքային խումբ կհաղթահարի իր համար սահմանված մրցատարածությունը: Բոլոր հաղթողներին (բացի փոքրերից) եւ մրցանակակիրներին հանձնելու ենք մեդալ, դիպլոմ եւ դրամական պարգեւ, իսկ երեխաներին դրամի փոխարեն՝ մարզահագուստ»:
Աշոտ ՀԱԿՈԲՅԱՆ
