Ապրիլյան պատերազմի ժամանակ Թալիշում նահատակված Վիկտոր Յուզիխովիչի մայրը՝ Աննա Յուզիխովիչը քիչ առաջ որդի է ունեցել, անունը ի պատիվ հերոս եղբոր՝ դրել են Վիկտոր։ Փոքրիկը ծնվել է Գյումրու «Մոր ու մանկան» ավստրիական մանկական հիվանդանոցում։ Նրա մորաքույրը՝ Սոնան, Aravot.am-ին փոխանցեց, որ փոքրիկը ծնվել է 3 կիլոգրամ, 350 գրամ քաշով։
Նա ասաց, որ փոքրիկը շատ նման է Վիկտորին, հատկապես քիթն ու աչքերը հիշեցնում են հերոսին։
«Աննան հղի է եղել, սակայն տեղյակ չի եղել, որ հղի է, այդ ընթացքում երազ է տեսել, որ Վիտյան կորել է, ու իրենք փնտրում են նրան, նույնիսկ ամուսնուն ասել է՝ բեր ոստիկանություն դիմենք, Վիտյայիս գտնենք։ Երազում վերադարձել են տուն ու տեսել են, որ Վիտյան նստած է իր սենյակում ու ասել է՝ մամ, ես եկել եմ, վերադարձա։
Լուսանկարը՝ Արմեն Մկրտչյանի
Մայրը ծանր հոգեապրումների մեջ լինելով ու վատ զգալով՝ դիմել է բժշկի, պարզվել է հղի է։ Հենց երեխան ծնվեց, քրոջս առաջին խոսքն էր՝ Վիտյաս ծնվեց», պատմեց մորաքույրը։։
Վիկտորը մի քույր ունի, որն ամուսնացած է, եղբայրն էլ 14 տարեկան է։
Հիշեցնենք,որ Վիկտոր Յուզիխովիչի հայրը Մոլդովայում մեծացած ուկրաինացի է, իսկ մայրը՝ հայուհի։ Վիկտորը ծնվել ու մեծացել է Գյումրիում։ Նա Հայաստանի բռնցքամարտի բազմակի չեմպիոն էր, Եվրոպայի փոխչեմպիոն։ Նա իր երկու ընկերների ու հրամանատարի հետ մինչև վերջին շունչը մարտնչել էր թշնամու դեմ։ Վիկտորը թեև հնարավորություն ուներ շարունակելու ուսումը որպես բռնցքամարտիկ, սակայն պնդել է, որ պիտի բանակ գնա՝ հայտարարելով՝ «էլ ի՞նչ տղամարդ, որ բանակ չպիտի գնա»։ Նա ծնողներից թաքուն դարձել էր հետախույզ։
Նունե ԱՐԵՎՇԱՏՅԱՆ
