Ըստ «Լրագրողներ առանց սահմանների» միջազգային իրավապաշտպան կազմակերպության հրապարակած տվյալների՝ Հայաստանը մամուլի ազատության ինդեքսում զբաղեցնում է 80-րդ հորիզոնականը։
Այս աղյուսակում տեղ են գտել 179 երկրներ, որոնցից Նորվեգիան գտնվում է առաջին հորիզոնականում, Շվեդիան՝ երկրորդ, իսկ Նիդերլանդները՝ երրորդ։
Հայաստանի հարևան երկրներից Վրաստանը մամուլի ազատության ինդեքսում զբաղեցնում է 61-րդ հորիզոնականը, իսկ Ադրբեջանն ու Թուրքիան հետ են մնում Հայաստանից․ Թուրքիան զբաղեցում է 157-րդ հորիզոնականը, իսկ Ադրբեջանը՝ 163-րդ։
Ըստ նույն կազմակերպության հրապարակած տվյալների՝ Հայաստանը 2017թ․-ին զբաղեցնում էր 79-րդ հորիզոնականը, իսկ 2016-ին՝ 74-րդ հորիզոնականում էր։
Ինֆորմացիայի ազատության կենտրոնի հիմնադիր տնօրեն Շուշան Դոյդոյանի կարծիքով, այս անկման պատճառը նախորդ իշխանությունների կողմից ընդունված այն օրենսդրական ակտերն են, որոնք ուղղակիորեն ազդում էին մամուլի գործունեության ազատության վրա․ օրինակ` կառավարության նիստերի դռնփակ լինելը։
Նշենք, որ աղյուսակը կազմելիս «Լրագրողներ առանց սահմանների» միջազգային իրավապաշտպան կազմակերպությունը հաշվի է առնում ԶԼՄ-ների անկախությունը, միջավայրը, որտեղ աշխատում է լրատվամիջոցը, հաշվարկված ժամանակահատվածում լրագրողների և ԶԼՄ-ների նկատմամբ բռնություններն ու բռնությունների մասին հավաքված տվյալները:
Սոնա ԳԵՎՈՐԳՅԱՆ
