«Սասնա ծռերի» գործի իրական գնահատականը կտա պատմությունը: Նրանց հանդեպ համաներումը քաղաքական կամքի դրսեւորում է»,-«Պոստ սկրիպտում» մամուլի ակումբում այսօր լրագրողների հետ զրույցում անդրադառնալով փաստին, որ Կառավարության ներկայացրած համաներման նախագիծը տարածվում է նաեւ ՊՊԾ գունդը գրաված «Սասնա ծռեր» խմբի անդամների վրա (բացառությամբ սպանության հոդվածով մեղադրվող Արմեն Բիլյանի եւ Սմբատ Բարսեղյանի), ասաց փաստաբան Տիգրան Աթանեսյանը:
Նա նշեց. «Մարտի մեկի դեպքերի մասնակիցներն էլ համաներվեցին: Սա դրա կրկնությունն է»: Լրագրողները հետաքրքրվեցին՝ որքանո՞վ է առկա մտահոգություն, որ «Սասնա ծռերի» համաներման փաստը հետագայում հանրության շրջանում կարող է նրանց արարքները կրկնելու մտադրություն ամրապնդել, Տիգրան Աթանեսյանը նկատեց. «Հարց կառաջանա՝ արդյո՞ք մեկը չի որոշի նույնը կրկնել, ասենք, տասը տարի հետո՝ ներկայիս իշխանությունների դեմ: Նման ռիսկը կա, դժվար է ասել: Ամեն դեպքում, իշխանությունը գտել է, որ «Սասնա ծռերի» գործի հենց այսպիսի ավարտն է ճիշտ»: Փաստաբանի խոսքով՝ պատմությունը ցույց կտա, թե իշխանության նշյալ որոշումը որքանով էր ճիշտ:
Լուիզա ՍՈՒՔԻԱՍՅԱՆ
