Պաշտպանության նախարար Դավիթ Տոնոյանն այսօր վստահեցրել է, որ այս պահին սահմանին իրավիճակը կայուն է, հրադադարը հիմնականում պահպանվում է: Ըստ նրա, թե Պաշտպանության բանակի շփման գծի, թե ՀՀ սահմանների ուղղությամբ, ընդամենը Նախիջեւանի ուղղությամբ եղել է ընդամենը երկու կրակոց:
Նախարարն այսօր այցելել էր Եռաբլուր՝ հարգանքի տուրք մատուցելու հոկտեմբերի 27-ի զոհերի հիշատակին:
Լրագրողների հարցին, թե հավատո՞ւմ է, որ նոր իշխանության օրոք, կբացահայտվի՝ ով էր հոկտեմբերի 27-ի պատվիրատուն, նախարարը պատասխանեց՝ ամեն ինչ բացահայտվելու է, որովհետեւ ժամանակն իր գործն անելու է, ու եթե իրականում եղել են պատվիրատուներ, կբացահայտվեն:
Ըստ նրա՝ սպարապետ Վազգեն Սարգսյանի կորուստն անդառնալի էր. «Ես իրականում չեմ կարող գնահատել այն դաժանությունը, որը կատարվել է հոկտեմբերի 27-ին, իրականում ինչ-որ մի բան, վերեւից անարդարություն կար, մասնավորապես մեր սպարապետի նկատմամբ»:
Արփինե ՍԻՄՈՆՅԱՆ
