Հայկ Մարությանը նշանակել է վարչական շրջանների մի քանի ղեկավարների

Երեւանի քաղաքապետ Հայկ Մարությանը երեկ ստորագրել է մի քանի որոշումներ՝ վարչական շրջանների ղեկավարներ նշանակելու մասին:

ԴԱՎԻԹ ԿԱՐԱՊԵՏՅԱՆԻՆ ԵՐԵՎԱՆԻ ՄԱԼԱԹԻԱ-ՍԵԲԱՍՏԻԱ ՎԱՐՉԱԿԱՆ ՇՐՋԱՆԻ ՂԵԿԱՎԱՐ ՆՇԱՆԱԿԵԼՈՒ ՄԱՍԻՆ

Ղեկավարվելով «Հանրային ծառայության մասին» օրենքի 6-րդ հոդվածի 3-րդ և 5-րդ մասերով, 9-րդ հոդվածի 15-րդ մասով, «Երևան քաղաքում տեղական ինքնակառավարման մասին» օրենքի 52-րդ հոդվածի 1-ին մասի 7-րդ կետով՝

1.Դավիթ Կարապետյանին՝ 2018 թվականի հոկտեմբերի 27-ից նշանակել Երևանի Մալաթիա-Սեբաստիա վարչական շրջանի ղեկավար։

2. Ընդունել ի գիտություն, որ Երևանի Մալաթիա-Սեբաստիա վարչական շրջանի ղեկավարի պաշտոնակատար Արտակ Ալեքսանյանի լիազորությունները՝ համաձայն «Հանրային ծառայության մասին» օրենքի 6-րդ հոդվածի 3-րդ մասի, համարվում են դադարած 2018թ. հոկտեմբերի 27-ից:

 ԱՐԱՄ ԴԱՆԻԵԼՅԱՆԻՆ ԵՐԵՎԱՆԻ ԱՐԱԲԿԻՐ ՎԱՐՉԱԿԱՆ ՇՐՋԱՆԻ ՂԵԿԱՎԱՐ ՆՇԱՆԱԿԵԼՈՒ ՄԱՍԻՆ

Ղեկավարվելով «Հանրային ծառայության մասին» օրենքի 6-րդ հոդվածի  3-րդ   և 5-րդ մասերով, 9-րդ հոդվածի 15-րդ մասով, «Երևան քաղաքում տեղական ինքնակառավարման մասին»   օրենքի 52-րդ հոդվածի 1-ին մասի 7-րդ կետով՝

1.Արամ Դանիելյանին՝ 2018 թվականի հոկտեմբերի 27-ից նշանակել  Երևանի Արաբկիր  վարչական շրջանի ղեկավար։

2. Ուժը կորցրած ճանաչել Երևանի քաղաքապետի 2018թ. հոկտեմբերի 10-ի հ.3274-Ա որոշման 2-րդ կետը:

ՄԻՔԱՅԵԼ ԹՈՒՄԱՍՅԱՆԻՆ ԵՐԵՎԱՆԻ ԴԱՎԹԱՇԵՆ ՎԱՐՉԱԿԱՆ ՇՐՋԱՆԻ ՂԵԿԱՎԱՐ  ՆՇԱՆԱԿԵԼՈՒ ՄԱՍԻՆ

Ղեկավարվելով «Հանրային ծառայության մասին» օրենքի 6-րդ հոդվածի  3-րդ և 5-րդ մասերով, 9-րդ հոդվածի 15-րդ մասով, «Երևան քաղաքում տեղական ինքնակառավարման մասին»   օրենքի 52-րդ հոդվածի 1-ին մասի 7-րդ կետով՝

1.Միքայել Թումասյանին՝ 2018 թվականի հոկտեմբերի 27-ից նշանակել Երևանի Դավթաշեն վարչական շրջանի ղեկավար։

2.Ընդունել ի գիտություն, որ Երևանի Դավթաշեն վարչական շրջանի ղեկավարի պաշտոնակատար Ռուսլան Բաղդասարյանի լիազորությունները՝ համաձայն «Հանրային ծառայության մասին» օրենքի 6-րդ հոդվածի 3-րդ մասի,  համարվում են դադարած  2018թ. հոկտեմբերի 27-ից:

Նշենք նաեւ, որ Դավթաշեն վարչական շրջանի ղեկավարի պաշտոնակատար Ռուսլան Բաղդասարյանը ֆեյսբուքյան իր էջում տարածել է հետեւյալ հայտարարությունը:

Ուզում եմ տեղեկացնել ձեզ, որ դադարեցնում եմ Դավթաշեն վարչական շրջանի ղեկավարի լիազորություններս։

Չեմ ուզում ծեծված խոսքերով ասել, թե այս 6 տարվա ընթացքում ինչ ենք արել կամ ինչ ձեռբերումներ ունենք։ Արել եմ այն, ինչ պետք է անեի՝ որպես թաղապետ ու որպես Դավթաշենում ծնված, մեծացած ու Դավթաշենը սիրող մարդ։ Կան բաներ, որ կցանկանայի անել, սակայն չեմ կարողացել կամ չեմ հասցրել, ինչի համար հայցում եմ ձեր ներողամտությունը։

Շնորհակալ եմ բոլորիդ։ Չեք պատկերացնում, թե պաշտոնավարմանս հենց առաջին օրվանից մինչ այժմ որքան եք ինձ օգնել Դավթաշենը արդյունավետ կառավարելու գործում՝ ձեր օրինապաշտությամբ, պատասխանատվությամբ և Դավթաշենի նկատմամբ ձեր վերաբերմունքով։

Շնորհակալ եմ նաև իմ «չեմպիոն» աշխատակազմին, որը եղած հնարավորությունների շրջանակում արել է առավելագույնը, որպեսզի դավթաշենցին իրեն հարմարավետ զգա, որպեսզի Դավթաշենը լինի թիվ մեկը։

Հավատացնում եմ, շատ դժվար էր բոլորիս կողմից հարգված պարոն Արթուր Գևորգյանից ստանալ փայլուն ժառանգություն, այդ բարձր նշաձողը պահպանել ու եղածի վրա ավելացնել։ Կարծում եմ՝ դա մեզ մոտ ստացվեց։

2008 թվականից սկսած մեր թաղամասը տարեցտարի ավելի հարմար ու բարեկարգ է դարձել։ Ու այսօր առանց ավելորդ համեստության կարող եմ ասել, որ հաջորդ թաղապետին թողնում եմ մայրաքաղաքի լավագույն վարչական շրջանը:

Հույս ունեմ, որ հաջորդ թաղապետը կլինի պրոֆեսիոնալ, արդյունավետ, Դավթաշենը նույնքան կսիրի, որքան իր նախորդները և կկարողանա է՛լ ավելի զարգացնել ու առաջ տանել մեր հրաշալի թաղամասը։ Իսկ ես՝ որպես Դավթաշենի բնակիչ, միշտ պատրաստ եմ իմ հնարավորությունների սահմաններում ամեն ինչ անել, որպեսզի մեր Դավթաշենը դառնա ավելի ու ավելի լավը։

Սիրով ձեր
Ռուսլան Բաղդասարյան