«Ազատություն» ռ/կ. Ազգային ժողովի պատգամավոր, Երկրապահ կամավորականների միության նախկին նախագահ Մանվել Գրիգորյանը դիմել է կառավարությանը՝ ցանկություն հայտնելով պետությանը նվիրել Ակնալիճ համայնքում գտնվող «Ակնալճի կուղբաբուծական տնտեսություն» ընկերության 329 հեկտար տարածքը:
Վերջինիս փաստաբան Լևոն Բաղդասարյանը «Ազատության» հետ զրույցում հաստատեց տեղեկատվությունը՝ հավելելով․ – «Շուկայական արժեքը, նվազագույն գներով գնահատվել է փորձագետի կողմից, մոտ 10 միլիոն դոլարի չափով ընդհանուր արժեքն է»:
«Ազատության» հարցին՝ ինչի՞ հետ է կապված այս նվիրատվությունը, արդյո՞ք այդպիսով Գրիգորյանը ցանկանում է մեղմացնել իր նկատմամբ հանրության վատ վերաբերմունքը, փաստաբանն արձագանքեց․ – «Միանշանակ ոչ, որովհետև իրեն մեղսագրված արարքը ոչ միայն չի ընդունում, այլև մեկ ժամ շուտ ցանկանում է, որպեսզի պարզեն, ճշտեն և ճիշտ գնահատականը տան դրա հետ կապված: Իսկ ինչ վերաբերում է հանրության վերաբերմունքին, հանրությունը մի փոքր՝ այսօր սրբադասում են, վաղը թշնամի են սարքում, հաջորդ օրը նորից հերոս են սարքում, բայց քրեական գործի հետ դա ուղղակի կապ ունենալ չի կարող»:
