«Հեղափոխության քաղաքական բլոկը կայացած է, բայց տնտեսական հեղափոխություն դեռ տեղի չի ունեցել: Եթե արագ տնտեսական բարեփոխումներ չիրականացնենք, կունենանք տնտեսության եւ քաղաքականության խզում»,-«Պոստ սկրիպտում» մամուլի ակումբում լրագրողների հետ հանդիպմանն այսօր հայտարարեց ԱԺ «Ծառուկյան» խմբակցության պատգամավոր Սերգեյ Բագրատյանը: Նա պատասխանեց հարցին, թե ինչու տնտեսությունը «չի հասցնում» հեղափոխական գործընթացի հետեւից. «Որեւէ բան չի փոխվել՝ բացի քաղաքական կամքից, որը ժխտում է կոռուպցիան եւ անարդարությունը, բայց քայլեր չեն ձեռնարկվել: Նախկին ռեժիմի տնտեսական գործիչները նոր պայմաններում պատրաստ չեն վերափոխվել»:
Բագրատյանը մանրամասնեց, որ խոշոր խաղացողները նախկին ռեժիմի հետ պայմանավորվածությունների սխեմայով են շարունակում աշխատել. «Նրանց մի մասը փորձել է հովանավորչություն փնտրել նոր իշխանության տարբեր օղակներում: Այս պահին խոշոր խաղացողների մի մասն աշխատում է նախկինում ձեւավորված համակարգում. նրանք չունեն քաղաքական հովանավորչություն, բայց ունեն կապեր՝ մաքսային եւ հարկային մարմիններում: Քանի դեռ հարկային-մաքսային օրենսդրությունը չի փոխվել, նոր խաղացողներ ի հայտ չեն գա»:
Ըստ պատգամավորի՝ նախկին ռեժիմի տնտեսական խաղացողները հեշտ չեն զիջելու իրենց դիրքերը. «Տնտեսական հեղափոխություն կարող է տեղի ունենալ, եթե արտահերթ խորհրդարանական ընտրություններից հետո նախկին խաղացողներն այլեւս մրցունակ չլինեն: Ներկայում շատ տնտեսվարողներ խանգարում են տնտեսության գարգացմանը. եթե նախկինում ապահովագրված լինելով հովանավորչությամբ՝ նրանք ազատ վարկային ռեսուրսեր էին գտնում եւ ընդլայնում իրենց գործունեությունը, ապա ներկայում այլեւս ներդրումներ եւ նոր միջոցներ չեն ներգրավում՝ իրենց առեւտրի կազմակերպման համար՝ չունենալով նոր իշխանությունների հովանավորչությունը»:
Լուիզա ՍՈՒՔԻԱՍՅԱՆ
