«ՀՀ ԱԺ նստաշրջանում անակնկալ եղավ այն առումով, որ ՀՀԿ-ն օրենսդրական սաբոտաժ կամ բլոկ արեց Ընտրական օրենսգրքի նոր նախագիծը»,-«Տեսակետ» մամուլի ակումբում լրագրողների հետ հանդիպմանը հայտարարեց Արտաքին հարաբերությունների հանձնաժողովի նախկին նախագահ, միջազգային հարցերով փորձագետ Հովհաննես Իգիթյանը:
Նա փաստեց՝ պիտի հասկանանք, իրավիճակը փոխվել է այն իմաստով, որ Նիկոլ Փաշինյան-ՀՀԿ խմբակցություն բանակցությունները որևէ կապ չունեն անձնական կամ միջկուսակցական պայմանավորվածությունների հետ: Այստեղ կա ժողովուրդ, որն ապրիլից պնդում է՝ այս ԱԺ-ն չի ներկայացնում իր շահերն ու համամասնությունը:
Ըստ նրա՝ ՀՀԿ-ին ևս ձեռք չի տալիս հին Ընտրական օրենսգիրքը. «Ոչ մեկին դա ձեռք չի տալիս, բայց նա դրանք անում են ուղղակի խոչընդոտելու Նիկոլ Փաշինյանի կամ ժողովրդի պահանջները»:
Դառնալով հարցին, թե ինչ խորհրդարան կունենանք ապագայում, Հովհաննես Իգիթյանն ասաց. «Մենք հիմա չենք գնում դասական իմաստով խորհրդարան ընտրելու: Այս ընտրությունները գնում են նախագահական համատեքստով, ժողովուրդը գնում է ընտրելու պետության թիվ մեկ դեմքին: Այս իրավիճակում մեկը պետք է ընտրվի, կոմպրոմիս հնարավոր չէ: Սա է մոդելը: Համոզված եմ, նոր մեծամասնությունը խորհրդարանում կփորձի շտկել այդ հանգամանքը: Եթե ժողովուրդը գնում է այս ընտրություններին՝ նկատի ունենալով, թե ով է լինելու առաջին դեմքը, այլ քաղաքական ուժ որևէ թեկնածու այլընտրանքային չի ներկայացնում»:
Ըստ Հովհաննես Իգիթյանի՝ կա Նիկոլ Փաշինյան և ժողովուրդ, որը գնում է ընտրելու առաջին դեմք, ոչ թե աջակցելու խորհրդարանական թիմին:
Դառնալով այն հայտարարություններին, թե հնարավոր է ՀՀԿ-ն ներկայացնի Կարեն Կարապետյանի թեկնածությունը՝ Հովհաննես Իգիթյանը նկատեց. «Կարեն Կարապետյանը ոնց որ թե այսօր նշանակվում է աշխարհի ամենակոռումպացված կազմակերպության նախագահներից մեկը: Սա՞ էր իրենց թեկնածուն՝ ում ուշքն ու միտքը եղել է ՌԴ կազմակերպություններում տեղ գտնելը, որը կապ չունի ՀՀ-ի շահերի հետ: Թող գնա, հարստանա Ռուսաստանի հաշվին»:
Դառնալով «Լուսավոր Հայաստանի» վարած քաղաքականությանը՝ Հովհաննես Իգիթյանն այսպիսի կարծիք հայտնեց. «Այն քաղաքական ուժը, որն ասում է՝ պաշտպանում ենք Նիկոլ Փաշինյանին, բայց առանձին են գնում, ես այդ խմբին շատ չեմ հասկանում: Ինչ վերաբերում է կառուցողական ընդդիմություն լինելու պնդումներին՝ ասեմ, որ այդ դեպքում պետք է ասեին, թե մենք Նիկոլ Փաշինյանի այս կամ այն գծի կամ հայտարարության հետ համաձայն չենք և գտնում ենք, որ այս մեկն ավելի լավ կիրականացնի»:
Տաթև ՀԱՐՈՒԹՅՈՒՆՅԱՆ
