«Դատավորը, մեզ համար անհասկանալիորեն եկավ այն եզրակացության, որ մեր բողոքը պիտի մերժվի, որոշում կայացրեց մերժելու մասին: Անցավ մյուս բողոքների քննարկմանը: Ես դատավորին ասացի՝ նկատի ունենալով, որ նույն փաստերի ու փաստական հանգամանքների վերաբերյալ են նաեւ մյուս բողոքները, հետեւաբար, դուք արդեն իսկ ունեք կանխակալ վերաբերմունք»:
Այսօր Վերաքննիչ քրեական դատարանը որոշել է, որ Yerevan.today-ի խմբագրությունում ոստիկանության եւ քննչականի խուզարկության թույլտվության մեջ ոչ մի անօրինական բան չի եղել:
Հիշեցնենք, որ այսօր վիճարկվում էր ինչպես կայքի, այնպես էլ կայքի սեփականատիրոջ՝ Հովնանյանի, նաեւ իր հարեւանի տան խուզարկության օրինականությունը:
Վերաքննիչում նիստը դռնփակ էր, նիստից հետո Aravot.am-ի հետ զրույցում կայքի փաստաբան Արմեն Ֆերոյանն (լուսանկարում) ասաց, որ նիստում առաջինը քննարկել են Yerevan.today-ի խուզարկության հարցը. «Դատավորը, մեզ համար անհասկանալիորեն եկավ այն եզրակացության, որ մեր բողոքը պիտի մերժվի, որոշում կայացրեց մերժելու մասին: Անցավ մյուս բողոքների քննարկմանը: Ես դատավորին ասացի՝ նկատի ունենալով, որ նույն փաստերի ու փաստական հանգամանքների վերաբերյալ են նաեւ մյուս բողոքները, հետեւաբար, դուք արդեն իսկ ունեք կանխակալ վերաբերմունք եւ չեք կարող օբյեկտիվորեն քննել այս գործը, ուստի խնդրում եմ ժամկետ տրամադրել, որպեսզի ես կարողանամ ինքնաբացարկի միջնորդություն ներկայացնել»:
Մյուս նիստը նշանակված է հոկտեմբերի 27-ին, 15.30-ին:
Հռիփսիմե ՋԵԲԵՋՅԱՆ
