Կոստանդնուպոլիսի մեր աղբյուրնեռրից տեղեկանում ենք, որ վաղը, հոկտեմբերի 26-ին Պոլսո պատրիարքության ընդհանուր փոխանորդ նշանակված Արամ արք. Աթեշյանը, հնարավորինս թաքուն, մեկնելու է Սբ. Էջմիածին։
Թե ի՞նչ առաքելությամբ է արք. Աթեշյանը էջմիածին մեկնում, ինչպես ժամանման հանգամանքները, մնում է մութ և առեղծվածային: Սակայն նկատի առնելով այն հանգամանքը, որ նա ի հեճուկս ողջ հայության և մանավանդ պոլսահայության կամքի, ներկայանում է, որպես Պոլսո Պատրիարքության ընդհանուր փոխանորդ, ու նաև որ Թուրքիայի նախագահ Ռեջեփ Թայիփ Էրդողանին իր եղբայրը համարելով ամիսներ առաջ՝ 2017 թ.-ի դեկտեմբերին, հակադարձելով իր դեմ ժողովրդական բողոքին հայտարարում էր, որ «Ես այսօր Թուրքիո իշխանություններուն աչքին կշարունակեմ մնալ իբրև Պոլսո Պատրիարքության ընդհանուր փոխանորդ», կարելի է կռահել, որ Աթեշյանի առաքելությունը չի կարող ունենալ հայանպաստ ուղղվածություն։
Հայաստանի Հանրաապետության և ողջ հայության, ի մասնավորի Հայաստանյայց Առաքելական Սբ. եկեղեցու դեմ ցանկացած բացասական և անհաճո զարգացումն ի սկզբանէ կանխելու սպասելիքով, Ամենայն հայոց կաթողիկոսությունից ակնկալվում է, որ Պոլսո պատրիարկության և հատկապես Աթեշյանի հետ առնչվող ցանկացած զարգացումն ու առընչությունը կատարել բոլորովին թափանցիկ՝ իրազեկելով ողջ հայությանը, և համախորհուրդ՝ ՀՀ քաղաքական ղեկավարության հետ։
«Արաքս» շաբաթաթերթ,
Թեհրան, 25 հոկտեմբերի 2018
