«Չեմ ուզում կանխորոշել…Հայաստանն աջակցում է Մինսկի խմբի ձեւաչափին, եւ այդ փաստն ուրախալի է»,-լրագրողների հետ զրույցում այսօր անդրադառնալով հարցին, թե, ի վերջո, ի՞նչ կետերով փաստաթուղթ է դրված Արցախյան հակամարտության կարգավորման բանակցային սեղանին, ասաց ԱՄՆ նախագահ Դոնալդ Թրամփի՝ ազգային անվտանգության հարցերով խորհրդական Ջոն Բոլթոնը, որը պաշտոնական այցով առաջին անգամ Երեւանում է: Հիշեցնենք, որ ԵԱՀԿ Մինսկի խմբի՝ ԱՄՆ-ն ներկայացնող նախկին համանախագահ Ռիչարդ Հոգլանդն ավելի վաղ հայտարարել էր՝ բանակցային սեղանին «Մադրիդյան սկզբունքները»(հակամարտության կարգավորման փոխզիջումային տարբերակը, որը ենթադրում է նաեւ որոշակի տարածքների վերադարձ Ադրբեջանին՝ Արցախի կարգավիճակի դիմաց) չեն, այլ նոր փաստաթուղթ:
Ջոն Բոլթոնը հարցին հստակ պատասխան չտվեց, փոխարենը՝ հիշեցրեց ԱՄՆ նախկին արտգործնախարար Ջեյմս Բեյքերի համոզմունքը՝ հակամարտությունների կարգավորման առնչությամբ. «Նա ասում էր, որ եթե կողմերից մեկը որեւէ բան առաջ է քաշում, պարտադիր չէ, որ դա ընդունվի»:
Ինչ վերաբերում է ՀՀ վարչապետի ԺՊ Նիկոլ Փաշինյանի այն հայտարարությանը, որ Արցախը պետք է վերադառնա բանակցային սեղանի շուրջ, այս դեպքում էլ ամերիկացի բարձրաստիճան պաշտոնյան գնահատականներ չտվեց, միայն նշեց. «Եթե ՀՀ-ում սպասվող խորհրդարանական ընտրություններում վարչապետն ու նրա քաղաքական ուժը ստանան մանդատ, դա վարչապետի համար լավ հնարավորություն է՝ նաեւ Արցախի խնդրի լուծման համար վճռորոշ քայլեր ձեռնարկելու ուղղությամբ: Եթե պատրաստակամություն լինի, մենք էլ, որպես համանախագահող-երկիր, կաշխատենք, որպեսզի Ադրբեջանի կողմից այդ ուղղությամբ արձագանք լինի»:
Լուիզա ՍՈՒՔԻԱՍՅԱՆ
