«Ելք» խմբակցության պատգամավոր Հայկ Կոնջորյանն այսօր ԱԺ-ում վարչապետի թեկնածու Նիկոլ Փաշինյանից հետաքրքրվեց արտաքին քաղաքականության մասին: Փաշինյանը պատասխանեց, որ այս ընթացքում անընդհատ ահազանգեր են հնչում, որ իրենց կառավարությունը ինչ-որ արտաքին քաղաքական օրակարգ է ձախողել, տապալել, ջախջախել. «Սկզբից մեծ ահազանգ կար, որ հայ-ռուսական հարաբերությունները վերջնականորեն ու անշրջելիորեն փչացել են: Այսօր ես կարող եմ ասել, որ հայ-ռուսական հարաբերություններում երբեք վստահության այսպիսի բարձր մակարդակ չի եղել, ինչքան մենք ունենք: Հետո մեզ սկսեցին մեղադրել ՌԴ-ին ծախվելու մեջ ու ասացին՝ այ, եթե ՌԴ-ին ծախվել եք, ուրեմն Արեւմուտքի, Եվրոպայի հետ հարաբերությունները լրիվ ձախողվեցին: Թույլ տվեք ասել, որ եվրոպական մեր գործընկերների հետ հարաբերություններում նույնպես երբեք փոխվստահության այսպիսի բարձր մակարդակ չի եղել: Սպասվում է ԱՄՆ բարձրաստիճան պատվիրակության այցը, պետք է բանակցություններ լինեն ու համոզված եմ,, մենք նույն էֆեկտի կհասնենք այստեղ»:
Գաղտնիքը, ըստ Փաշինյանի, լեգիտիմությունն է, որը սկզբունքային է հատկապես արտաքին քաղաքականության ոլորտում:
Փաշինյանն ասաց, որ սա չի նշանակում, թե արտաքին հարաբերության բոլոր խնդիրները լուծված են, մեկ հարց է լուծված՝ մեզ ընկալում են՝ որպես գործընկեր ու Հայաստանը անկեղծ է իր գործընկերների հետ. «Կան թնջուկներ, որոնք մենք պետք է կարողանանք լուծել, քննարկել»:
Հռիփսիմե ՋԵԲԵՋՅԱՆ
