«Ռուսաստանի հայերի միության» նախագահ, գործարար Արա Աբրահամյանն այսօր լրագրողների հետ հանդիպման էր եկել անսովոր տեսքով՝ չսափրված: Լրագրողները հետաքրքրվեցին, թե ինչու չի սափրվում՝ թավշյա հեղափոխության թրենդներից մեկին է ուզում հետամուտ լինել եւ այդպես չսափրվող Նիկոլ Փաշինյանին նմանվե՞լ: Աբրահամյանը կատակեց. «Ամեն ինչ անում եմ, որ արդյունավետ աշխատեմ, այդ նպատակով մորուք եմ պահում»:
Ապա` նշեց իրական պատճառը՝ ասելով, որ վերջերս նավով է ճամփորդել, այդ պատճառով չի սափրվել, ինչից հետո իրեն ասել են, որ այդպես սազում է:
«Չեմ ուզում վարչապետին նմանվել, ուզում եմ Արա Աբրահամյանին նմանվել»,-ակնարկեց նա: Գործարարը նշեց, որ ՀՀ նոր եւ հին իշխանությունների հետ իր հարաբերությունները շատ լավ են եղել եւ ներկայում էլ լավ են. «Իմ գործն աշխատելն է, իսկ իշխանությունը ժամանակավոր բնույթ է կրում: Միշտ եկել եմ ՀՀ եւ շարունակելու եմ գալ: Եթե բացակայում եմ, չի նշանակում, թե չեմ ուզում ՀՀ գալ»:
Ըստ Արա Աբրահամյանի՝ իր նպատակը մեկն է՝ երկրի կայունությունը, որովհետեւ բիզնեսը սիրում է կայունություն. «Եթե հնարավորություն ունենամ օգնել երկրին, կօգնեմ՝ անկախ նրանից, թե ով է վերջինիս ղեկավարը: Կօգնեմ՝ որքան հնարավոր է»:
Լուիզա ՍՈՒՔԻԱՍՅԱՆ
