Կաշխատի՞ նոր քաղաքապետ Հայկ Մարությանի հետ հարցին ի պատասխան՝ Երեւանի փոխքաղաքապետ Արամ Սուքիասյանն ասաց, որ դեռ պարզ չէ, տասը օրից կհստակեցվի: Հարցին, թե ունի՞ ցանկություն նոր քաղաքապետի հետ աշխատելու, պատասխանեց. «Ցանկությունը միակողմանի չի կարող լինել, ես կարծում եմ սա միմյանց ուսումնասիրման, միմյանց սկզբունքները ուսումնասիրելու մի փուլ է, մի տասը օրից կկողմնորոշվենք»:
Այն դիտարկմանը, թե Կամո Արեյանը մնաց, Արամ Սուքիասյանն ասաց՝ նա դեռ նշանակված չէ:
Aravot.am-ի հարցին, թե ունի՞ անհամաձայնություններ նոր քաղաքապետի գործելաոճի հետ, ասենք՝ համամիտ չէ նրա որոշումներին, Արամ Սուքիասյանը պատասխանեց. «Ոչ, մի քանի օր է, որ մենք աշխատում ենք»:
Արամ Սուքիասյանը հայտնեց, որ Էրեբունի-Երեւան տոնակատարության համար ծախսվել է շուրջ 258 միլիոն դրամ՝ ներառյալ արտերկրից ժամանած հյուրերի, հուշանվերների, քայլարշավների, բեմահարթակների ձեւավորման համար: Իսկ թե որքան է խնայվել, պարոն Սուքիասյանը չէր կարող ասել. «Նախատեսված որեւէ հստակ թիվ չի եղել, որպեսզի ես կարողանամ ասել, թե որքան է խնայված»:
Փոխքաղաքապետն ասաց, որ նախորդ տարի գրեթե նույնքան է ծախսվել նույն տոնակատարության համար:
Լուսինե ԲՈՒԴԱՂՅԱՆ
