Այսօր ԱԺ նիստում երեկվա «Ընտրական օրենսգրքի» տապալման շուրջ հաշիվներ մաքրեցին:
Տիգրան Ուրիխանյանն ասաց, որ երեկվա «ավանտյուրայից» հետո ԱԺ-ն պիտի իր բոլոր գործիքները օգտագործի, որ ՀՀԿ-ին արագ բերի նոր ԸՕ-ն անցկացնելու, խորհրդարանում ուզում են ռեյտինգայինով ապահովել ՀՀԿ-ի լուրջ ներկայություն, սրա դեմն առնել է պետք:
ԱԺ նախագահ Արա Բաբլոյանը պատասխանեց. «Դուք ցանկանում եք, որ ես ասեմ այն, ինչ իրականությո՞ւնն է, շատ լավ: Կցանկանայի ամբողջ մեր բնակչությունը գնահատեր ավանտյուրան որտեղ է: Նախ, որպես ԱԺ նախագահ, ես տվեցի բոլոր հնարավորությունները, որ այն մարդիկ, որոնք հայտարարել էին, որ կաջակցեն արտահերթ ընտրություններին պատշաճ անցկացնելու առումով, ունենային հնարավորություն գալ այս դահլիճ ու մասնակցել ոչ միայն քվեարկությանը, այլեւ քննարկմանը: Ունենալով 69 մարդ, որոնք հայտարարել էին համաձայնությունը աջակցելու, այստեղ մասնակցեցին ընդամենը 57-ը, այն էլ՝ իմ կողմից տրված հավելյալ ժամանակի հաշվին: Մենք ընդամենը 50 մարդ ունեինք, չէինք կարողանում նույնիսկ նիստը սկսել: Երեւի թե ազնիվ եղավ միայն մի խմբակցություն, որը ի սկզբանե հայտարարեց, որ համաձայն չէ եւ մինչեւ վերջ մնաց ոչ համաձայն: Եթե ուզում եք՝ քննադատեք, բայց եկեք լինենք ազնիվ, 69 մարդ է հայտարարել, որ կաջակցեն, նրանցից ընդամենը 57-ը եկան: Բարի եղեք գալ, մասնակցել 69 պատգամավորով եւ պատշաճ ձեւով քվեարկել, անցկացնել այդ նախագիծը, որի համար տրված էր բոլոր հնարավորությունները»:
«Ծառուկյան» խմբակցության պատգամավոր Նաիրա Զոհրաբյանը հորդորեց Բաբլոյանին շատ չմտահոգվել՝ այսօրվանից իրենց դաշինքը «Ելքի» հետ ստորագրահավաք են կազմակերպում ու երկուշաբթի արտահերթ նիստ են հրավիրելու՝ ԸՕ-ն անցկացնելու համար: Նա հորդորեց ՀՀԿ-ականներին չբոյկոտել, չտանել սադրանքների:
Ուրիխանյանը քննադատեց «Քաղաքացիական պայմանագրի» ու վարչապետի այն դիրքորոշումը, որ մենք անցնելու ենք ԱԺ՝ որ օրենսգրքով էլ լինի, ԸՕ-ի հարցը թող ԱԺ-ն լուծի. «Պետք է անցողիկ հնարավորություն ստեղծել ընդհանրապես երկրում բոլորի համար հավասարապես, ոչ միայն ՔՊ-ի համար»:
Ուրիխանյանն ասաց, որ ՀՀԿ-ականները ուզում են նորից «հիմար ձեւով», ռեյտինգայինով ճողոպրել խորհրդարան. «Հերիք է ձեր խաղերն անեք»:
ԱԺ փոխնախագահ Արփինե Հովհաննիսյանն էլ ասաց, որ «կայունությունը քաղաքականության մեջ չափազանց կարեւոր հատկանիշ է»: Նա հորդորեց, որ ՔՊ-ի ներկայացուցիչերը Ուրիխանյանի ասածների վերաբերյալ իրենց դիրքորոշումը հայտնեն:
Հռիփսիմե ՋԵԲԵՋՅԱՆ
