Օրեր առաջ Երևանի Ազնավուրի կեցավայրում Ֆրանսիայի և Հայաստանի նախագահների մասնակցությամբ հանրությանը ներկայացվեց նշված կենտրոնի «վերակառուցման» մի նախագիծ, որը երբևէ Հայաստանի որևէ իրավասու ատյանում չի քննարկվել և չի համաձայնեցվել: Որպես նախագծի հեղինակ ներկայացվեց ֆրանսահայ ճարտարապետ Արիս Ադամյանը: Այս մասին ահազանգում են ՀՀ վաստակավոր ճարտարապետներ Աշոտ Ալեքսանյանը, Հովհաննես Մութաֆյանը և Լևոն Վարդանյանը` խնդրի վրա հրավիրելով Հայաստանի ճարտարապետների պալատի նախագահ Մկրտիչ Մինասյանի և Հայաստանի քաղաքաշինության կոմիտեի նախագահ Ավետիք Էլոյանի ուշադրությունը: Ճարտարապետներն իրենց գրած դիմում-նամակում մասնավորապես նշել են, որ արտերկրյա կառուցապատողների կողմից Ազնավուրի կեցավայրի՝ առանց հեղինակի համաձայնության, կամայական փոփոխությունը շատ վատ նախադեպ կարող է դառնալ իրենցից յուրաքանչյուրի ճարտարապետական ստեղծագործությունների ապագայի համար:
«Իրատեսի» հետ զրույցում ՄԿՐՏԻՉ ՄԻՆԱՍՅԱՆՆ ասաց, որ տեղի է ունեցել պրոֆեսիոնալ էթիկայի և հեղինակային իրավունքի նորմերի կոպիտ խախտում. «Նարեկ Սարգսյանը արդեն գոյություն ունեցող շենքի հեղինակն է, որևէ միջամտության դեպքում անպայման պետք է տեղյակ պահել հեղինակին: Աշխարհում ընդունված ձև է դա»:
Վերաձևումներն ու կամայականությունը կասեցնելու համար ճարտարապետների պալատի հանձնախումբը քննարկելու է հարցը և նամակ է ուղարկելու Ազնավուրի կենտրոնի տնօրենությանը: «Նրանց քայլերը տարակուսանք են առաջացնում մեր մեջ: Եթե նման ձևով ենք սկսելու աշխատել, շատ վատ սկիզբ է: Նրանց մոտ դա սոսկալի պարսավանքի կենթարկվեր: Բայց քանի որ սա «երրորդ» երկիր է, ամեն ինչ կարելի է անել»,- ընդգծեց մեր զրուցակիցը:
Արմինե ՍԱՐԳՍՅԱՆ
Հոդվածն ամբողջությամբ կարող եք կարդալ «Իրատես» թերթի այսօրվա համարում
