«Եթե Արցախից շրջաններ հանձնենք Ադրբեջանին, Բաքվի հայերը որտե՞ղ են ապրելու, Բաքվո՞ւմ». Արշակյան

«ԱՄՆ-ն ղեկավարվում է երեք սկզբունքներով՝ ժողովուրդների ինքնորոշում, սահմանների անձեռնմխելիություն, ուժի չկիրառում: ԱՄՆ-ի առաքելությունն ազգերի ինքնորոշման իրավունքն է»,-«Հայելի» մամուլի ակումբում այսօր լրագրողների հետ հանդիպմանն անդրադառնալով ՀՀ-ում դիվանագիտական առաքելությունն ավարտող ԱՄՆ դեսպան Ռիչարդ Միլսի՝ «գրավյալ տարածքները վերադարձնելու» մասին հայտարարությանը, ասաց նախկին Գերագույն խորհրդի պատգամավոր, քաղաքական գործիչ Ազատ Արշակյանը:

Հիշեցնենք, որ տեւական ժամանակ է՝ Արցախյան հակամարտության կարգավորման բանակցային սեղանին հայտնի փոխզիջումային փաստաթղթի կետերից մեկն էլ հենց որոշ տարածքների վերադարձին է առնչվում:

Ազատ Արշակյանը նկատեց՝ ԵԱՀԿ Մինսկի խմբի՝ քաղաքական մոդել ձեւավորող միակ պետությունը, որն ինքնորոշման իրավունքով է առաջնորդվում, ԱՄՆ-ն է. «Հայ ժողովրդի ինքնորոշման իրավունքն ունի հզոր պաշտպան՝ ԱՄՆ-ն, եւ վերջինիցս ազդված ԵՄ-ն, նաեւ՝ աշխարհի այլ հատվածների մի շարք քանի այլ երկրներ»:

Անդրադառնալով փոխզիջումային փաստաթղթի կետերին՝ Արշակյանն ընդգծեց. «Ուժի չկիրառումը եւ սահմանների անձեռնմխելիությունը քննարկվելիք հարցեր են: Հիմա շատ կարեւոր է ներգաղթի հարցը: Փաստացի, ունենք նախկինում ադրբեջանաբնակ հայեր, որոնք հիմա իրավունք չունեն վերադառնալու իրենց հայրենիք: Սա մեր թաքցրած խաղաքարտն է: Հաջորդիվ, եթե Արցախից երկու կամ յոթ շրջան հանձնենք Ադրբեջանին, Բաքվի հայերը, երբ վերադառնան, որտե՞ղ են ապրելու, Բաքվո՞ւմ…որքա՞ն կարելի է նրանց Բաքվից արտաքսել: Ուրեմն, Բաքուն նրանց հայրենիքը չէ»:

Հիշեցնենք, որ տարբեր տվյալներով՝ Ադրբեջանական ԽՍՀ-ից ջարդերի հետեւանքով արտագաղթել է մոտ 600 հազար հայ:

Ազատ Արշակյանի բնորոշմամբ. «Ադրբեջանական ԽՍՀ-ի տարածքում կես միլիոն հայ պետք է ստանա իր բաժին հայրենիքը. «Երբ խաղաղության մասին խոսակցությունը կավարտվի, հաջորդ հարցը կլինի ներգաղթի խնդիրը, եւ այն հարցը, թե որտեղ են ապրելու նշյալ հայերը: Բոլորը հասկանում են, որ ոչ մի թիզ հող չի հանձնվի»:

Լուիզա ՍՈՒՔԻԱՍՅԱՆ