«Նախկին ընտրական համակարգը իրոք արատավոր է, այս օրենքը պետք է ընդունվի»,- այսօր ԱԺ-ում «Ընտրական օրենսգրքի» նախագծի քննարկման ժամանակ իր ելույթում ասաց «Ծառուկյան» խմբակցության պատգամավոր Արարատ Զուրաբյանը:
Նա նշեց, որ իշխանությունները ժամանակ են կորցրել, պետք էր սրանից 2 ամիս առաջ ԸՕ-ն ընդունել, որ տեսակետ էլ չհնչեր, թե հապշտապ ընդունում են:
«Ելք» խմբակցության անդամ Էդմոն Մարուքյանն ասաց, որ այո, խաղի կանոնները ընտրություններից առաջ փոխվում են, բայց ավելի ազատական ու ներառական մոտեցումներ են որդեգրում, հետագայում այն բողոքները, որ դա արագ ու հապճեպ է արվում, ստորադասվում է դրան:
Մարուքյանն ասաց, որ գործող ընտրական օրենսգրքին դեմ է նաեւ Երեւանի ավագանու ներկայիս ձեւավորված կազմի համար. «Ինձ դուր չի գալիս այդ կազմը՝ ուժերի դասավորվածությունը նկատի ունեմ: Կա 57 հոգանոց ֆրակցիա, կա 5 եւ 3 հոգանոց երկու այլ ընդդիմադիր ֆրակցիաներ: Հիմա ինչ, ուզում եք նույն բանը լինի խորհրդարանո՞ւմ»:
Նա ասաց, որ սա շանս է, նոր Հայաստանի շունչը կարող է հասնել բոլորին, ով կընտրվի՝ կընտրվի:
«Ծառուկյան» խմբակցության պատգամավոր Սերգեյ Բագրատյանն էլ իր ելույթում հիշեցրեց ՀՀԿ-ականներին, թե առաջ իրենք ինչեր էին ասում. «Չեմ ընդունում պարոն Աշոտյանի այն միտքը, որ մի քանի որ առաջ ասեց՝ կա քաղաքական ուժ, որ երեկ մի բան էին ասում, այսօր մի ուրիշ բան են ասում: Ես փառք եմ տալիս էս քաղաքական ուժին, որ երեկ մի բան էր ասում, այսօր՝ մի բան, բայց երբ դա ասում է այն ուժի ներկայացուցիչը, որն ասում էր՝ որեւէ քաղաքական գործիչ եթե ուզում է էս երկրում հաջողություն ունենա, Մելիք Ադամյանով պիտի անցնի, էդ մոռացե՞լ եք էս ամեն ինչը: Մոռացել եք, որ արդեն անեկդոտ էին սարքել, երբ ասում էին՝ լավ, մինչեւ ե՞րբ պետք է այս ամեն ինչը լինի, Ղարաբաղի բարբառով ասում էին՝ 200 տարի՝ էրկու հերյուր տարի»:
«Ելքի» պատգամավոր Հրաչյա Հակոբյանն էլ հիշեցրեց, որ ՀՀԿ-ն դեռ երկու ամսի առաջ փորձում էր համոզել, թե շատ էլ լավ խորհրդարան ունենք, բայց այսօր ԱԺ-ի պատկերը ցույց տվեց, թե ինչպիսի խորհրդարան ունենք ու այս ձեւով խորհրդարանը պատրաստվում էր մնալ, կարևոր օրենքներ ընդունել մինչեւ մայիս:
Հռիփսիմե ՋԵԲԵՋՅԱՆ
