ՀՀ արտակարգ և լիազոր դեսպան Արման Նավասարդյանի գնահատմամբ՝ մինչև հիմա տեղի չի ունեցել Փաշինյան-Ալիև դասական հանդիպում:
«Մեդիա կենտրոնում» «Ղարաբաղյան հակամարտության շուրջ հայ-ադրբեջանական բանակցություններ հեռանկարը» թեմայով քննարկմանը անդրադառնալով Դուշանբեից հետո եղած լավատեսությանը՝ Արման Նավասարդյանն ասաց. «Կարծես թե հրաձգությունը նվազել է սահմանին, բայց այդ ամենը ժամանակավոր երևույթներ են: Ըստ երևույթին, ընտրություններից հետո կարող է նոր թափ ստանալ կամ այս կամ այն ուղղությամբ»:
Ըստ Արման Նավասարդյանի՝ հակամարտության կարգավորման հարցում ակտիվ սկսել է մասնակցություն ցուցաբերել ԱՄՆ-ն, իսկ ՌԴ-ն միշտ ակտիվ է եղել:
Դառնալով ԱՄՆ դեսպան Միլսի հայտարարություններին՝ Արման Նավասարդյանը նկատեց՝ դա կարծես թե ազդանշանային բան էր, թե ինչ ուղղությամբ պիտի լուծվի ԼՂ հարցը:
Միջազգային հարաբերությունների փորձագետ Հովհաննես Իգիթյանը նշեց՝ այսօր բոլոր կողմերը, նկատի ունեմ համանախագահներին, այս կամ այն ձևով նշում են, որ բանակցային փուլն այդպես հնարավոր չէ շարունակել այս իրավիճակում: Ըստ նրա՝ այն, որ ՀՀ վարչապետի պաշտոնակատար Նիկոլ Փաշինյանը նշեց, թե երբ խոսվում է փոխզիջումների մասին, ապա ընդունված է դարձել, որ այդ զիջումները պիտի ՀՀ-ն իրականացնի, անգամ մեզ բարեկամ երկրների ներկայացուցիչները ունեն այն պատկերացումը, ինչ ներկայացրել է Նիկոլ Փաշինյանը. «Բոլորը հասկանում են, որ ԼՂՀ հարցը մեկ ամսվա կտրվածքով չի լուծվի: Անվտանգության հիմնական խնդիրը մեր տարածաշրջանում առաջին հերթին Ադրբեջանի ագրեսիվությունն է և հակամարտության տեղափոխվելը ՀՀ-Ադրբեջան սահման: Այս իրավիճակը կարելի է օգտագործել այն կտրվածքով, որ շարունակելով պայմանավորվածությունները Վիեննայում և Սանկտ Պետերբուրգում ձեռք բերված, պետք է նախապես հող նախապատրաստեն բանակցությունների համար: Բոլորը խոսում են, թե ինչ կլինի, կլինի դեկտեմբերյան խորհրդարանական ընտրություններից հետո»:
Դառնալով փոխզիջման տրամաբանությանը՝ Հովհաննես Իգիթյանն ասաց. «Չեմ գտնում, որ փոխզիջման մասին խոսելն ընդհանրապես ճիշտ է բանակցություններից առաջ: Փոխզիջումը ոչ բոլոր կոնֆլիկտներում է ընդունվում որպես փոխզիջում: Եթե ժողովրդի գոյությունը պահելու համար մի լուծում պիտի լինի, ո՞րն է այս լուծման փոխզիջումը»:
«Մարդկային զարգացման միջազգային կենտրոնի» ղեկավար Թևան Պողոսյանի կարծիքով՝ ցանկանում ես խաղաղություն, պետք է պատրաստվել պատերազմի. պատերազմից վախենալ պետք չի: Ըստ նրա՝ մենք այժմ գտնվում ենք շատ հետաքրքիր փուլում. «Երկու կողմն էլ փորձում են իրենց դիրքերը: Ադրբեջանը տարբեր հանդիպումներում կարողանում է իր տեսակետները հայտնել, իր ռազմական հզորությունները զարգացնել, մարտահրավերներ անել, զորավարժություններ են անում, այսինքն՝ պատրաստվում են ռազմական սցենարի առաջ տանելուն: Օրինակ, երբ ասում ենք ԼՂՀ-ն ինքն իր տեղը գտնի ու բանակցությունների մասնակցությանը, ուրախ կլինեինք տեսնել ինտենսիվ ԼՂՀ-ի հետ հարաբերություններ, այսինքն՝ ԼՂՀ ԱԳՆ և ՀՀ ԱԳՆ աշխատանքը: Կարող է կա, եթե իրիկունը հեռախոսով խոսում են, չգիտեմ՝ դա աշխատանք է, թե՝ ոչ»:
Թևան Պողոսյանին հետաքրքիր է ԼՂ հակամարտության հարցում կուսակցությունների դիրքորոշումը, որպեսզի ընտրելիս հնարավոր լինի որոշում կայացնել, ու չլինեն անակնկալներ:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
