Այսօր խորհրդարանում «Ընտրական օրենսգրքի» քննարկման ժամանակ ՀՀԿ պատգամավոր Արմեն Աշոտյանն իր ելույթում ասաց՝ սա «Տոների եւ հիշատակի մասին օրենքը չի», ժողովուրդ, սա Ընտրական օրենսգիրքն է:
«Ելք» խմբակցության պատգամավոր Սասուն Միքայելյանն էլ արձագանքեց նրան՝ ասելով, որ նախկին իշխանությունների մոտ հետաքրքիր մթնոլորտ է, քանի որ նախկինում միշտ կեղծել են ընտրությունները. «Պարոն Աշոտյանը մի հատ հետաքրքիր բան ասավ, ասում ա՝ տոնական օրենքի փոփոխություն չի: Պարոն Աշոտյանը ճիշտն ասաց, որովհետեւ իրենք բոլոր ժամանակներում ընտրությունները կեղծել են ու տոնական տրամադրություն է ձեւավորվել իրանց մոտ, տոն են արել»:
Սասուն Միքայելյանը նաեւ մի անեկդոտ պատմեց. «Մեկն ասում ա՝ ապարանցիների վերջին անեկդոտը լսե՞լ եք: Ասում ա՝ խի էլ անեկդոտ չի՞ լինելու: Հիմա էս օրենքն է: Օրենքում հետագայում փոփոխություն կլինի հաջորդ գումարման նստաշրջաններում, ժողովուրդ ջան: Երկու տարբերակ կա: Նախ, սա հանրության պահանջն է, շուտափույթ մենք չենք ուզում: Եթե կառավարությունը խելոք լիներ, կբերեր փոփոխված տարբերակն ու հինը, կասեր՝ կառավարությունը կողմ է հին տարբերակով, դուք կասեիք՝ չէ, պիտի անպայման փոփոխվի բառերի հետեւից չընկնեն, կա հանրային պահանջ: Էս երկրում իրողություն ա փոխվել, մարդիկ կան, հլը չեն պատկերացնում, գիտեն Լենին պապին կգա, չգիտեմ ով կգա, պրծե՛լ ա, ժողովո՛ւրդ ջան: Էսօր պիտի մենք ժողովրդին հնարավորություն տանք»:
Նա ասաց, որ եթե ռեյտինգային տարբերակը չփոխվի, մենք մեր ժողովրդին հանելու ենք իրար դեմ. «Էսօր ներքաղաքական իրավիճակը երկրում շատ վատ ա, բերում են բարեկամ, ընկեր իրար դեմ են լինում, ներքաղաքական իրավիճակն էլ է հանգստանալու, պլյուս դրան, կուսակցություններ են ձեւավորվելու: Առավելությունը նաեւ ինչում է, ընտրագրավը, ներքին շեմը չվերցնենք, 2 տոկոսի հետ կապված է նաեւ: Մենք ամբիոն ենք տալիս այն ուժին, որն ինչ-որ շեմ է հաղթահարել, որ կմտնի ԱԺ, հետագայում այդ կուսակցությունը կարող է 1-ին տեղն ընկնի կամ երկրորդ: Եկեք դուրս գանք էս ինտրիգային իրավիճակներից»:
Հռիփսիմե ՋԵԲԵՋՅԱՆ
