Խորհրդարանում «Ընտրական օրենսգրքի» նախագծի քննարկման ժամանակ «Ծառուկյան» խմբակցության պատգամավոր Նաիրա Զոհրաբյանը ՀՀԿ-ականներին հորդորեց սաբոտաժի չգնալ ու Վենետիկի հանձնաժողովով այսպես ասած չվախեցնել, որովհետեւ Վենետիկի հանձնաժողովի փորձագետների, հանձնաժողովի նախագահի հետ հանդիպել է, իրենք ասում են, որ այն լուծումները, որին կգնան ՀՀ քաղաքական ուժերը, լինի կոնսենսուսով ընդունված. «Մի՛ փորձեք համախոհությունը տապալել»:
Նույն խմբակցության պատգամավոր Գեւորգ Պետրոսյանն ասաց, որ անթերի, բյուրեղյա օրենսգիրք չի լինում, նա ընդգծեց, որ եթե Վենետիկի հանձնաժողովի գնահատականն են հիշեցնում, ապա պետք է հասկանալ, որ Վենետիկի հանձնաժողովի հիշատակած կոնսենսուսի անվան տակ չպետք է հասկանալ խորհրդարանում ընդգրկված ուժերի միաձայն համաձայնությունը. «Եթե քաղաքական ուժերի մեծամասնությունն ընդունում են նոր ԸՕ ունենալու անհրաժեշտությունը, ապա քաղաքական կոնսենսուսի հարցը կարելի է համարել լուծված՝ անկախ նրանից, որ որեւէ քաղաքական ուժի մեջ ընդգրկված առանձին պատգամավորներ կարող են չհամաձայնել»:
ՀՅԴ խմբակցության քարտուղար Արմենուհի Կյուրեղյանն իր ելույթում ասաց, որ որեւէ մեկի մոտ կասկած չի առաջանում, որ նոր փաթեթում կուսակցական բազմակարծության ապահովման համար էական փոփոխություններ կան: Նա առաջարկեց նոր օրենսգրքում փոխել հին օրենսգրքի այն կարգավորումը, ըստ որի 2/3 մանդատ կարող է ստանալ մեկ ուժը, որովհետեւ այդքան մանդատով մի ուժը կարող է միանձնյա փոխել սահմանադրական օրենքներն ու Սահմանադրությունը:
ԱԺ փոխնախագահ Միքայել Մելքումյանն իր ելույթում ասաց, որ այն պատգամավորները, որոնք անցել են ԱԺ մեծամասնական ընտրակարգով, կամ ռեյտինգայինով, ԱԺ-ում կա՛մ ընդհանրապես ելույթ չեն ունեցել, կա՛մ ունեցել են շատ քիչ դեպքերում, այն էլ՝ իրենց տարածքի խնդիրների հետ կապված կամ ԱԺ-կառավարություն հարցուպատասխանի ժամանակ ու պետք է գնահատական տալ՝ դա լա՞վ էր, թե՞ վատ: Նա ասաց, որ հեղափոխությունից հետո, երբ որ շանս կա գնալ լավ ճանապարհով, պետք է ադեկվատ քայլեր անեն: Ըստ Մելքումյանի, նախորդ ընտրական մոդելը ցույց է տվել, որ տարբեր արտոնություններ են ստացել մարդիկ՝ սկսած ներկրումների արտոնությունից, գրված ու չգրված արտոնություններից ու ամբողջ համակարգը սպասարկում էր այդ արտոնությունները: Նա ասաց, որ հեռու է այն մտքից, թե փետրվար, մարտ ամիսներին, երբ ընտրությունները ավարտված լինեն, մեծ ներդրումներ են գալու Հայաստան, բայց խաղի կանոններ են սահմանվելու, որը զերծ կմնա նախկինի արատավոր թերություններից ու սխալներից:
«Ելք» խմբակցության պատգամավոր Գեւորգ Գորգիսյանն ասաց, որ չի հասկանում ՀՀԿ-ականների շարժառիթը, ինչի՞ են ուզում հասնել, նոր ԸՕ նախագիծը այո, հապճեպ է ընդունվում, բայց ոչ ոք չի վիճարկում, որ այն ավելի լավն է, բերելու է քաղաքական դաշտի զարգացման, խորհրդարանում նոր ուժերի ներգրավման ու պետք է, որ այս օրենքն անցնի. «Որեւէ հիմնավոր պատճառ, թե ինչու պետք է այս օրենքը չանցնի, ես չլսեցի»:
Իսկ ՀՀԿ պատգամավոր Արմեն Աշոտյանը հայտարարեց, որ նման գործընթացով ԸՕ ընդունել չի կարելի. «Արդյոք այն միջավայրը, որով կրկնաքվեարկություններով փորձում ենք քվորում ապահովել, «Ընտրական օրենսգրքի» բարեփոխմա՞ն միջավայր է, արդյոք ժամանակային սահմանափակումը, հապճեպությունը նպաստելո՞ւ է ժողովրդավարության զարգացմանը»:
Աշոտյանը հիշեցրեց, թե երբ է պատրաստ եղել օրենսգրքի նախագիծը՝ հոկտեմբերի 16-ին ու քանի օրերի ընթացքում է կառավարությունը այն հասցրել խորհրդարան, Վենետիկի հանձնաժողովին, հիմա էլ փորձում էր երկու ընթերցմամբ միանգամից քննարկել ու ընդունել. «Ժողովո՛ւրդ, սա «Տոների եւ հիշատակի օրերի մասին» օրենքը չի, «Ընտրական օրենսգիրքն է», առավել եւս, եթե կարծում եք, որ այդ ԸՕ-ով պետք է նոր ընտրություններ անցկացվեն: Այո՛ դեկտեմբերյան ընտրություններն անխուսափելի են, քաղաքական տրամաբանությունը դրա մասին է հուշում, խնդրում եմ այս քննարկումը չվերածել այդ ընտրությունների հարցի քննարկման, չկա այդպիսի հարց փաստացի: Եթե կարծում եք, թե կոնսենսուս կա առանց ՀՀԿ-ի, էլ խի՞ եք մեզ համոզում: Դե լավ է, իմ խորին ընկալման, եվրոպական ժողովրդավարության ընկալման մեջ կոնսենսուսն այնտեղ է, որտեղ հակադիր ուժերը համաձայնվում են: Այսօրվա գործող իշխանությանը հակադիր բեւեռը ՀՀԿ-ն է, որը այդ իշխանության մաս չի կազմել, համագործակցության քաղաքական որոշում չունի, ի՞նչ կոնսենսուս՝ առանց արմատական ընդդիմության կարո՞ղ եք ինձ բացատրել, եթե կարող է լինել, էլ խի՞ եք մեզ համոզում, հարգելիներս, մենք որեւէ քաղաքական շահ այսօր չենք արտահայտում: Հլը մեծ հարց է՝ ՀՀԿ-ին ինչ է ձեռք տալիս՝ իջեցված շեմը, 4-րդ կուսակցությունը, թե՞ գործող «Ընտրական օրենսգիրքը», դա մեծ հարց է: Ռեյտինգայինի շնորհիվ մենք հսկայական ձայներ ստացանք, այսօր ՀՀԿ-ի հետ չեն համագործակցում այլեւս այդ ձայները բերած պատգամավորների մի զգալի մասը: Մենք ունենք սկզբունքի հարց»:
Ըստ Աշոտյանի, եթե այսկերպ ԸՕ-ն անցկացնի կառավարությունը, մեր երկրի վրա կախելու է դամոկլյան սուր, որովհետեւ եթե այսօր ներում են դա, որովհետեւը կա էյֆորիա, թե ժողովրդավար ենք, պուպուշ ենք եւ այլն. «բայց վաղը, մյուս օրը, երբ որ Սիրիա զորախումբ ուղարկենք, այդ ժամանակ մենք պատասխան ենք տալու բոլորով միասին՝ անկախ նրանից ես խորհրդարանում կլինե՞մ, թե՞ չէ»:
Հռիփսիմե ՋԵԲԵՋՅԱՆ
