ՀՅԴ խմբակցության ղեկավար Արմեն Ռուստամյանը չի բացառում, որ Ընտրական օրենսգիրքը խորհրդարանը չընդունի: «Այս խորհրդարանից ամեն ինչ սպասելի է»,- այսօր խորհրդարանում լրագրողների հետ զրույցում ասաց նա: Իր կարծիքով, ԸՕ-ի փոփոխությունների շուրջ կոնսենսուս չկա:
Լրագրողներից մեկը հիշեցրեց հոկտեմբերի 2-ին`ԱԺ կանոնակարգ-օրենքի ընդունման ժամանակ տեղի ունեցածը եւ հարցրեց`մտավախություններ չկա՞ն, որ խորհրդարանը նորից կպաշարեն: «Թող պաշարեն: Որ պաշարեցին`ինչ ստացվեց, ինչ որ հարց լուծվե՞ց: Մենք մեր վարկը գցեցինք`ամբողջ աշխարհի առաջ: Դրա «թթու ջուրը» հետո կխմենք»,- ասաց նա:
Այն, որ ՀՀԿ-ն չի պատրաստվում «կողմ» քվեարկել նախագծին, Արմեն Ռուստամյանը սաբոտաժ չի համարում. «Իրենք իրենց տեսակետն ունեն»: Նաեւ հստակեցնում է ՀՅԴ-ի մոտեցումը`ԸՕ-ն փոխելը ճիշտ է, բայց այն փոխելուց հետո էլ պետք է ժամանակ հատկացվի քաղաքական ուժերին, որպեսզի պատրաստվեն: Ինքը կարծում է, որ այս հապշտապությունը`անպայման դեկտեմբերին արտահերթ ընտրություններ անցկացնել, իսկապես ական է դնելու այդ ընտրությունների տակ ու ինքը չի հասկանում թե գործող իշխանության ինչի՞ն է պետք այդ ականապատ դաշտով մեծամասնություն ստանալ խորհրդարանում:
Այլ մանրամասները` տեսանյութում
Նելլի ԳՐԻԳՈՐՅԱՆ
