Հարցին, թե արդյոք Հունան Պողոսյանին մարզպետ նշանակելու գործոնն էր հարուցել սյունեցիների դժգոհությունը, որ Կապան քաղաքում պարտվեց «Քաղաքացիական պայմանագիր» կուսակցության թեկնածու Նարեկ Բաբայանը, ՀՀ վարչապետի պաշտոնակատար Նիկոլ Փաշինյանը պատասխանեց, որ ցավում է, որ ՔՊ-ի թեկնածուն պարտություն է կրել, սակայն ուրախ է, որ եւս մեկ քայլ կատարվեց՝ արձանագրելու հավատարմությունը թավշյա հեղափոխության արժեքներին:
Նիկոլ Փաշինյանը բացառեց Հունան Պողոսյանի գործոնը Կապանում իրենց թեկնածուի պարտության հարցում. «Մենք հարցումներով գիտեինք իրավիճակը, ընդհակառակը, վերջին քարոզարշավի երկրորդ մասում մեր թեկնածուի վարկանիշը շատ լուրջ աճ արձանագրեց, բայց ցավոք, մինչեւ վերջ չհասցրեցինք»:
Այն հարցին, թե նախորդ իշխանությունները մշտապես Սյունիքից են ձայներ ապահովել իրենց օգտին, դրանում օրինաչափությո՞ւն կա, Փաշինյանն ի պատասխան ասաց. «Հիմա, եթե այդ զուգահեռի մեջ նայենք, ապա առավել եւս ակնհայտ է հեղափոխության հաղթանակը»:
Նիկոլ Փաշինյանն այսօր լրագրողների հարցերին պատասխանեց Մերիդիան Էքսպո կենտրոնում կազմակերպված «Եվրասիական շաբաթ» միջազգային համաժողովի ժամանակ:
Լուսինե ԲՈՒԴԱՂՅԱՆ
