«Շատ տգեղ երեւույթ է տեղի ունենում, մարդիկ նստած են ու չեն քվեարկում». Պատգամավորները ալարում են քվեարկել ԱԺ-ում

Այսօր ԱԺ արտահերթ նիստում մանդատ ստացավ ու հրապարակավ երդվեց ժողովրդի շահերին ծառայել ՀՀԿ խմբակցության պատգամավոր Մարտուն Գրիգորյանը:

Ուշագրավ է, որ այսօր ԱԺ-ում պետք է քննարկվի Ընտրական օրենսգիրքը, սակայն ե՛ւ պատգամավորների գրանցման ժամանակ եւ նիստի անցկացման որոշման հարցի քվեարկության ժամանակ էլեկտրոնային լուսավահանակը ցույց էր տալիս, որ բավարար ձայներ չկան: ԱԺ նախագահ Արա Բաբլոյանը զարմացած էր՝ ԱԺ նիստերի դահլիճում նստել են, բայց չեն ուզում քվեարկել. «Ես ուղղակի զարմացած եմ, որ մարդիկ նստած են, եկել են այստեղ հատուկ մասնակցելու, բայց ուշադիր չեն հետեւում ու չեն իրականացնում իրենց պարտավորությունը»:

«Ծառուկյան» խմբակցության պատգամավոր Նաիրա Զոհրաբյանն առաջարկեց, որ քվեարկությունը կրկնել, Արա Բաբլոյանն արձագանքեց. «Հասկանում եմ, կարող ենք կրկնել քվեարկությունը, բայց շատ տգեղ երեւույթ է տեղի ունենում, որ մարդիկ նստած են ու չեն քվեարկում: Կա՛մ թող արտահայտեն, որ իրենք չեն ուզում նիստը կայանա…»: Նաիրա Զոհրաբյանը Բաբլոյանին հորդորեց՝ «Մեր խմբակցությունը ամբողջությամբ քվեարկել է, դուք մեր կողմ եք նայում, էն կողմ նայեք, պարո՛ն Բաբլոյան»: Բաբլոյանը ծիծաղեց. «Ես բոլորին եմ նայում, կներեք, ձեզ չեմ նայում»:

Ի վերջո, ևս մեկ անգամ հարցը դրեցին քվեարկության եւ որոշումն ընդունվեց մի կերպ՝ 51 կողմ, 2 դեմ-ով:

Բայց հարցի քննարկման տեւողությունը երբ պետք է քվեարկությամբ հաստատեին, այն նորից չընդունվեց: ԱԺ նախագահն ասաց, որ եթե տեւողությունը, որը առաջարկում է կառավարությունը՝ 3 ժամ, չընդունվի, ստիպված պիտի լինեն հարցը քննարկել 1 ժամում:

Նաիրա Զոհրաբյանն առաջարկեց եւս մեկ անգամ քվեարկություն կազմակերպել, որովհետեւ ԸՕ-ն 1 ժամում քննարկել հնարավոր չէ: Նաիրա Զոհրաբյանն ասաց, որ իրենք շահագրգիռ կողմ են, որ ԸՕ-ն ընդունվի ու նորմալ քննարկվի:

Տիգրան Ուրիխանյանն էլ հայտարարեց. «Բա որ ասվում է Ազգային ժողովը պիտի ցրվի, այ հենց սրա համար էլ ասվում է: Հորդորում եմ արագ քվեարկել, ընդունել նոր օրենսգիրքը, ցրվել ու ընտրվել ժողովրդի կամոք»:

ԱԺ նախագահն արձագանքեց. «Նույնիսկ Ազգային ժողովը ցրելու համար պետք է պարկեշտ աշխատանք իրականացնել, որպեսզի մինչեւ վերջ մենք մեր պարտավորություններն իրականացնենք»:

Եվս մեկ անգամ քվեարկություն կազմակերպելով՝ այն ընդունվեց:

Հռիփսիմե ՋԵԲԵՋՅԱՆ