«Քանի որ ԿԸՀ գործառույթներն ավելի քիչ են, քան տարածքային ընտրական հանձնաժողովներինը, պետք է պարզել, թե ինչպես է անցնում քվեարկությունը, ինչ խնդիրներ են առաջանում։ Սա լավ առիթ է՝ շտկելու առկա թերությունները: Առաջիկայում մենք դրանք, բնականաբար, հաշվի կառնենք»,-լրագրողների հետ զրույցում այսօր ասաց Կենտրոնական ընտրական հանձնաժողովի նախագահ Տիգրան Մուկուչյանը, որը շրջայց էր կատարել Էջմիածնի մի շարք ընտրատեղամասերում:
Նա հայտնեց, որ տեղամասերում տեխնիկական սարքավորումները՝ մատնահետքերի գրանցման սարքերն անխափան են աշխատել, դժգոհություններ չեն եղել. «Ինչպես հայտնի է, տեղամասերից մեկում քվեաթերթիկը լուսանկարելու փորձ է գրանցվել, որին ԿԸՀ-ն արձագանքեց: Կարծում եմ՝ մեր արձագանքով է պայմանավորված այն փաստը, որ հետագայում այդ երեւույթը չկրկնվեց»:
Ըստ Տիգրան Մուկուչյանի՝ կարելի է փաստել, որ տեղամասերում ընտրություններն անցնում են բաց եւ թափանցիկ կերպով, ասել է թե՝ Ընտրական օրենսգրքի պահանջներին համապատասխան: ԿԸՀ նախագահը նաեւ համոզմունք հայտնեց, որ այս ՏԻՄ ընտրություններում քաղաքացիների մասնակցությունն ակտիվ է:
Լուիզա ՍՈՒՔԻԱՍՅԱՆ
