Aravot.am-ն ահազանգ է ստացել, որ Արմավիրի նորանշանակ մարզպետի ծառայողական` 055 LL 55 «Տոյոտա» պրադո մեքենայով մարդկանց տանում են ընտրատեղամասեր: Մարզպետի խորհրդական Նվեր Պետրոսյանն Aravot.am-ի հետ զրույցում հերքեց այդ տեղեկությունը: Արմավիրի մարզպետին նշանակել են մի քանի օր առաջ: Նվեր Պետրոսյանն ասում է, որ նորանշանակ մարզպետը նաեւ երեկ է եկել մարզպետարան, այսօր էլ է եղել եւ զբաղված է մարզի խնդիրներին ծանոթանալով: Նվեր Պետրոսյանը մանրամասնեց`մարզպետի մեքենան գնացել է ավտոլվացման կետ, որի հետ մարզպետարանը պայմանագիր ունի, մեքենան լվանալու համար. Ավտոլվացման կետն ու տեղամասը հարեւանությամբ են:
Այս առիթով, Արմավիրի քաղաքապետի իշխանական կուսակցության ներկայացուցիչ Դավիթ Խուդաթյանն էլ ասաց. «Բացառում եմ, որ նման բան լինի: Դա մեր իշխանության աշխատաոճը չէ»:
Խոսակցություններ կան, որ Արմավիրի մարզի Նորապատ գյուղի գյուղապետին ՔՊ-ական թեկնածու Դավիթ Խուդաթյանը խոստացել է աջակցել եւ կառավարությունում «լոբբինգ» անել հօգուտ նրա, որ Արմավիրի` Նորապատին սահմանակից բազմաբնակարան շենքները ներառվեն Նորապատի մեջ: Այս խոսակցություններն այդ թաղամասի բնակիչների զայրույթն են առաջացրել: Դավիթ Խուդաթյանը հերքում է, որ իր եւ Նորապատի գյուղապետի միջեւ նման պայմանավորվածություն կա: Հիշեցնում է`Նորապատի գյուղապետը հեղափոխության հենց սկզբից իրենց թիմի կողքն է կանգնած եւ հայտարարությամբ է միացել հեղափոխությանը. «Հետեւաբար, այդ գյուղապետին մեր կողմ բերելու խնդիր չունենք: Առհասարակ, նոր Հայաստանում որեւէ գյուղապետի մեր կողմ բերելու խնդիր չունենք»:
Ի դեպ, Էջմիածնի եւ Հրազդանի համեմատությամբ, Արմավիրում մասնակցության թվերը բավական մխիթարական են. մոտ 14 հազար ընտրողներից այս պահի դրությամբ ընտրությունների է մասնակցել 8000-ին մոտ ընտրող:
Հրազդանում եւ Արմավիրում ընտրողների մասնակցության թիվը հազիվ 30 տոկոսի է հասնում: Հրազդանում խոսակցություններ կան, որ թեկնածուների շտաբներում արդեն աշխուժություն է սկսվել`զանգերով, միջնորդություններով փորձում են մարդկանց տանել ընտրատեղամասեր: Նույն իրավիճակը նաեւ Էջմիածնում է:
Հրազդանում, մեր զրուցակիցներից մեկը նկատեց, որ թեկնածուներից որեւէ մեկին կողմ ընտրելու դեպքում, մարդիկ միեւնույն է քվեարկում են ոչ թե տվյալ թեկնածուին, այլ Նիկոլ Փաշինյանին:
Նելլի ԳՐԻԳՈՐՅԱՆ
