Հայաստանի լավագույն հեծանվորդ Էդգար Ստեփանյանը Ֆրանսիայում անցկացված Աշխարհի գավաթի առաջին փուլի երկրորդ օրը մասնակցեց սկրեչ մրցաձեւին: Նա մեկնարկեց կիսաեզրափակչում, սակայն չկարողացավ եզրափակիչ անցնել: Դրա համար անհրաժեշտ էր խմբում զբաղեցնել առնվազն 11-րդ տեղը: Սակայն նախորդ օրն «արթնացած» ոտնաթաթի նախկին վնասվածքը կրկին իրեն զգացնել տվեց: Հայ մարզիկը թեեւ ուժերի գերագույն լարումով պայքարեց մինչեւ վերջ, սակայն ցույց տվեց 12-րդ արդյունքը:
Էդգար Ստեփանյանի մարզիչ, Հայաստանի հավաքականի գլխավոր մարզիչ Արմեն Գյոզալյանը Aravot.am-ին տեղեկացրեց, որ չնայած մրցակից թիմերի բարձրակարգ մարզական բժիշկներն արել էին հնարավոր ամեն բան վնասվածքը թեկուզ ժամանակավորապես «քնեցնելու» համար, սակայն մրցակցային ծանրաբեռնվածությունն իր սեւ գործն այնուամենայնիվ արեց: Մարզչի խոսքով ինքն ու իր թիմը ամեն բան արել էին Ֆրանսիայում եւ Կանադայում անհրաժեշտ միավորներ հավաքելու եւ վարկանիշային դասակարգման ցուցակում հեծանվորդի դիրքերն էլ ավելի ամրապնդելու համար, սակայն սա սպորտ է եւ սպորտը երբեմն դաժան է լինում:
Արմեն Գյոզալյանը նաեւ ասաց, որ հիմա կարեւորը Էդգարի առողջությունն է, որ ինքը հեռախոսով արդեն կապվել է Երեւանի հետ, որպեսզի մեկնումը Կանադա չեղարկեն: «Այս վիճակով Կանադա մեկնելն անիմաստ է արդեն: Իմ եւ մեր թիմի համար հիմա առաջնայինը Էդգարի առողջությունն է: Այստեղ բժիշկներն ասում են, որ առնվազն 15 օր պիտի ինտենսիվ բուժում անցնի, որից հետո առնվազն եւս մեկ ամիս ցավող ոտքը չծանրաբեռնի: Սա խախտում է աշխարհի առաջնության ու Եվրոպական խաղերի ուղեգիր նվաճելու մեր բոլոր ծրագրերը, որին երբեք այսքան մոտ չէինք եղել: Եվ եթե Հայաստան վերադառնալուց հետո մեր ֆեդերացիայի ղեկավարությունը բուժման լուրջ ու գործնական քայլեր չձեռնարկի, ապա տարիների ամբողջ աշխատանքը ջուրը կընկնի»:
Աշոտ ՀԱԿՈԲՅԱՆ
