«Արժանապատիվ Հայաստան» կուսակցությունը հոկտեմբերի 20-ին անցկացրեց իր անդրանիկ համագումարը: Aravot.am-ի հետ զրույցում կուսակցության նախաձեռնող խմբի անդամ Մարինա Խաչատրյանը նշեց, որ կուսակցության մեջ ընդգրկված են տարբեր ոլորտներ ներկայացուցիչներ՝ հանրության տարբեր շերտերից, մարդիկ, որոնց կարծիքը կարեւորվում է:
«Կուսակցությունն ընդգրկուն է, ստեղծելու ենք մասնագիտական կառույցներ, որտեղ կոնկրետ մասնագետներ են ներգրաված լինելու եւ հստակ ծրագիր են ունենալու ու պատասխանատվություն են կրելու իրենց ծրագրերի, կայացրած որոշումների եւ իրականացման ժամկետների համար»,-ասաց տիկին Խաչատրյանը: Նրա ձեւակերպմամբ, իրենց կուսակցության ուժն այն է, որ իրենք գործի մարդ են. «Միայն թղթի վրա գրված չի լինելու…Ամեն ինչ անելու ենք, որ ամեն ինչ, որ ներառված է մեր ծրագրում, կյանքի կոչենք: Մեր նպատակը հայրենիքի շահն է, որեւէ անձնական շահ բացառվում է: Ղեկավարումը մեզ մոտ կոլեգիալ սկզբունքով է լինելու: Ընտրել ենք համակարգող կառույցի անդամներին, ուենենք նաեւ անկախ վերահսկող կառույց: Համակարգող կառույցի նախագահն ամեն տարի կփոխվի: Համակարգող կառույցի առաջին նիստին կընտրվի նաեւ նախագահը»:
Մարինա Խաչատրյանից հետաքրքրվեցինք՝ արդյոք մասնակցելու են խորհրդարանական ընտրություններին: «Մենք ունենք ժամանակային խնդիր: Ես կցանկանայի, որ ընտրությունները կայանային ոչ թե դեկտեմբերին, այլ փետրվար-մարտ ամիսներին, այդ ընթացքում նորաստեղծ կուսակցություններն էլ կկարողանային հայտ ներկայացնել խորհրդարան մտնելու համար: Ժողովուրդը հոգնել է այն ուժերից, որոնք քսան-քսանհինգ տարիների ընթացքում պարբերաբար ասպարեզ են դուրս գալիս: Իրականում նոր կուսակցությունների բացումը ճիշտ է, քանի որ երիտասարդներն ուզում են իրենց նոր մոտեցումները բերել, պետք է բոլորին հնարավորություն տալ մասնակցելու խորհրդարանական ընտրություններին»,-ասաց մեր զրուցակիցը:
Հարցին՝ արդյոք մեծաթիվ չեն կուսակցությունները Հայաստանում, տիկին Խաչատրյանը բացասական պատասխան տվեց, ապա հավելեց, որ այդպիսով ապահովվում է բազմակարծությունը:
Գոհար ՀԱԿՈԲՅԱՆ
