Հայաստանի համայնքների միության նախագահ Էմին Երիցյանի դիտարկմամբ, թավշյա հեղափոխությունից հետո տեղական ինքնակառավարման ոլորտում մրցակցային կուսակցական միջավայր դեռ չի ձևավորվել։
«Եթե նախկինում ՏԻՄ ընտրություններում հիմնական թեկնածուները ՀՀԿ–ի ներկայացուցիչներ էին, հիմա ՔՊ–ից են. անունները փոխվել են, բայց որակական փոփոխություն կարծես չունենք»,–այսօր «Պոստ սկրիպտում» ակումբում ասաց Էմին Երիցյանը։
Նրա խոսքով, Հայաստանում քաղաքական ուժերը տեղական ինքնակառավարումը երկրորդական են ընկալում։ Հեղափոխությունից հետո տեղական ինքնակառավարման ոլորտում մրցակցային կուսակցական միջավայր դեռ չի ձևավորվել՝ անկախ նրանից, որ այսօրվա իշխանությունը հասարակական մեծ աջակցություն է վայելում:
Էմին Երիցյանը նկատեց, որ ՏԻՄ ընտրություններում թեկնածուների նախընտրական քարոզչության ու ներկայացրած ծրագրերի հիմքում հեղափոխությունն է և քաղաքական հարցերը, մինչդեռ, շեշտը պետք է դրվեր տեղական խնդիրներին վերաբերող հարցերի վրա։
Արփինե ՍԻՄՈՆՅԱՆ
