Այսօր ԱԺ-ում լրագրողների հետ զրույցում արդարադատության նախարար Արտակ Զեյնալյանը հարցին՝ ասել եք, որ համաներումը լայն շրջանակ է ընդգրկելու, մոտավորապես քանի՞ հոգու մասին է խոսքը: Նախարարը պատասխանեց, որ այդ հարցը քննարկվելու է շուտով ԱԺ պետաիրավական հարցերի հանձնաժողովում, հետո՝ լիագումար նիստում. «Այս պահի դրությամբ այդ թվերը չեմ կարող հնչեցնել»: Հարցին՝ ճի՞շտ է, որ մոտ 850 անձ է համաներմամբ ազատ արձակվելու՝ նախարարը պատասխանեց, որ ոչ այո կասի, ոչ էլ ոչ:
Հարցին՝ մոտավորապես ե՞րբ է սպասվում համաներումը՝ Զեյնալյանը պատասխանեց, որ գալիք շաբաթվա ընթացքում այդ հարցը կքննարկվի, պարզ կլինի:
Նախարարն ասաց, որ իրենց կառավարությունը քրեակատարողական հիմնարկներում գերբեռնվածության հարցը լուծել է. «Չկա մեկը, որ քնելու տեղ չունի եւ հերթով են քնում: Մենք այս խնդիրը լուծել ենք: Այսօր ՔԿՀ-ներում կալանավորների եւ դատապարտյալների քանակը հասնում է 2935-ի, այսպիսի ցուցանիշ Հայաստանում չի եղել, նրանց թիվը եղել է 3900 եւ ավելի: Այսպիսի ցուցանիշ չի եղել եւ նպատակը բեռնաթափումը չի ՔԿՀ-ների, մենք այսպես ասած՝ «ավելցուկ» չունենք կալանավորների կամ դատապարտյալների: Սա համաներում է, մարդասիրական ակտ է, մարդասիրական ակցիա է, որն իրականացվում է այս իրադարձությունների լույսի ներքո: Կառավարությունը հանրության անունից այս ժեստն անում է՝ իր նկատմամբ ոտնձգություն իրականացրած մարդկանց համար»:
Լրագրողները հետաքրքրվեցին՝ ինչո՞ւ համաներումը կազմակերպեցիք հիմա՝ այս նախընտրական շրջանում, այլ ոչ թե, ասենք, սեպտեմբերի 21-ին, երբ սպասվում էր: Նախարարը պատասխանեց. «Բացարձակ որեւէ առնչություն չունի նախընտրական ժամանակահատվածի հետ եւ իմ մտքով անգամ չի էլ անցել, որ կարելի է նման բան մտածել»:
Դիտարկմանը՝ գուցե իրենց մտքով է անցել, օրինակ, վարչապետի, որ նախընտրական շրջանում բոնուսներ ու միավորներ ստանա՝ Զեյնալյանը արձագանքեց. «Ո՛չ, բացառվո՛ւմ է: Բացառում եմ, որովհետեւ նախարար նշանակվելուց 10 օր հետո նախագիծն, ըստ էության, պատրաստ է եղել, վերլուծվել, քննարկվել է»:
Հռիփսիմե ՋԵԲԵՋՅԱՆ
