«ԱՄՆ դեսպանն, իհարկե, հեռացող է, բայց ԱՄՆ պետդեպարտամենտը հեռացող չէ, որովհետև ԱՄՆ դեսպանի արտահայտած միտքն իր անձնական տեսակետը չէր»,- այսօր «Հենարան» ակումբում ասաց քաղաքագետ Արմեն Բադալյանը՝ անդրադառնալով վարչապետի ասածին, թե Հայաստանում դիվանագիտական առաքելությունն ավարտող ԱՄՆ դեսպան Ռիչարդ Միլսի՝ ԼՂ հակամարտության վերաբերյալ հայտարարությունը հեռացող դեսպանի ուղերձ էր։
«Միգուցե դա հեռացող դեսպանի մեսիջ էր, բայց արդյոք պետդեպարտամենտն էլ է հեռանում։ Այստեղ է խնդիրը գալիս, երբ դու չունես արտաքին քաղաքականության հայեցակարգ, որի մեջ Ղարաբաղը կարևոր տեղ պետք է զբաղեցնի, բնականաբար, հեռացող դեսպանների միջոցով որոշ երկրներ մեսիջներ են փոխանցում, ստուգելու հասարակության կամ իշխանության վերաբերմունքը», -ասաց Արմեն Բադալյանը:
Հիշեցնենք, որ EVN report-ին տված հարցազրույցում դեսպանն ասել էր, որ ԼՂ հակամարտության ցանկացած կարգավորում պահանջելու է գրավյալ տարածքների որոշակի մասի վերադարձ:
Անդրադառնալով ներքաղաքական զարգացումներին՝ նա կարծիք հայտնեց, որ վարչապետի մոտ լավ ստացվեց հին համակարգի քանդումը, բայց նրա և նրա թիմակիցների մոտ չի երևում ապագայի զարգացման ռազմավարությունը.
«Օրինակ, երբ ընտրվեցին, Ղարաբաղի հարցում այդ հարցով մի տեսակետ էր հնչում, դրանից հետո ուրիշ տեսակետ էր հնչում։ Արտաքին քաղաքականության մեջ տեսնում ենք, որ վարչապետը ԵԱՏՄ-ի մոլեռանդ ջատագով է դարձել, բացի ԵԱՏՄ-ից ինքն ուրիշ բան չի տեսնում, կարծես իր գլոբուսի վրա աշխարհը սկսում է Կալինինգրադից, ավարտվում է Վլադիվոստոկով»:
Արփինե ՍԻՄՈՆՅԱՆ
